Menchu Gal Aretoak hamar urte beteko ditu aurten eta Jose Antonio Sistiaga Mosso (Donostia, 1932) margolariari gorde dio urteko lehen erakusketaren tokia. Aipatu aretoak euskal artearen izen adierazgarrienen lanak bildu ditu, azpimarratzeko Gaur taldearen sortzaileak protagonista izan dituen zikloa. Hain justu, Mossorekin emango du amaitutzat zikloa.

Helena Elbustok komisariatutako erakusketan guztira 37 artelan bildu dira, 1959tik hasi, Parisen bizi zenetik, Donostiako tailerrean 2019an egindako sorkuntza berrienetaraino. Areto handiak hiru mihise handi ditu: ezkerrean, ‘Plissement’ (2000. urtekoa); atzealdean, ‘Llamarada’, bere aitari egindako omenaldia; eta, eskuinean, ‘La sortie au jour’, Maurice Raveli omenaldia. Ibilbidean, 1959. urteko Txinako tintetatik 60ko hamarkadako paper eta gouache grafitoetara arte egindako sorkuntzaren erakusgarri, bere azken sorkuntzentzat leku nabarmena duena, ‘Como en la naturaleza’ (2019) zortzi koadroko seriea kasu.

Areto txikian, bi zinema-mahai handitan "… ere erera baleibu izik subua aruaren …" filmeko zerrenden erreprodukzioak daude ikusgai, Sistiagak eskuz margotu zituenak. Horiekin batera, filmeko kutxa metaliko zaharrak eta filmari buruzko pinturen fotogramak erreproduzitzen dituzten abarketak. Aretoaren muntaia ‘Nu’ (1971) eta ‘Desnudos’ (1984) telesailetako paper gaineko argizarizko hainbat marrazkirekin osatzen da.

Gaur taldea

Sistiaga Mossoren erakusketak Gaur Taldearen sorreran parte hartu zuten artisten berrikusketa ixten du. Lan hori Menchu Gal aretoan erakutsi da jada, 2010ean inauguratu zenetik: Eduardo Chillida, Jorge Oteiza, Amable Arias, Nestor Basterretxea, Remigio Mendiburu, Rafael Ruiz Balerdi, Jose Luis Zumeta eta Jose Antonio Sistiaga.

Erakusketaren bueltan katalogo bat argitaratu da Jean Michel Bouhours arte historialari eta Pariseko Pompidou Zentroko buru ohiaren testuekin. Katalogo hori Menchu Gal aretoan egongo da eskuragarri, 3 euroren truke. Jose Antonio Sistigak bere gurasoei, Rafael Sistiaga eta Luisa Mossori, eskaini die. Bertan, bere ama, 15 urterekin, Compañia Irun Sporting Clubeko kantinera bezala ikus daiteke 1912an eta bere aita, Irungo Racing Clubeko jokalaria ere izan zena, urte berean ikus daiteke. Argazkien artean, Josefina eta Eulalia Mosso bere izebei egindako oroigarri bat ere jaso da.

‘Sistiaga Mosso’ erakusketa otsailaren 28an, martxoaren 27an eta apirilaren 24an, ostiraletan, bisita gidatu batekin osatuko da. Helena Elbusto komisarioak dinamizatuko ditu, eta 19:00etan hasiko dira. Ez da beharrezkoa aldez aurretik izena ematea.

Gainera, udal liburutegiak "… ere erera baleibu izik subua aruaren …" (1968-70) filmaren proiekzioa hartuko du. Bertan, Sistiagak 2.000 metro margotu zituen bi urtez, zinea eta pintura uztartuz. 75 minutuko iraupena du.