Euskaltelek ohar batean azaldu duenez, konfinamendua hasi zenetik deietan erabilitako denbora %75 igo da telefono finkoan eta %110 mugikorrean; beraz, konpainiak ondorioztatu duenez, «pertsonek elkarrizketa luzeagoak egiten dituzte senideekin egun hauetan».

Etxean daudenez, familiak datu sare finkora konektatzen dira, sakelekora beharrean, interneten nabigatzeko, filmak streaming bidez ikusteko, senide edo lagunekin bideokonferentziak egiteko, sarean jokoak partekatzeko, edo telelana egiteko.

Ildo horretan, Interneterako sarbidea egunero %71 hazi da, 5,3 Petabytera iritsiz (5,3 milioi Gigabyte), aurreko batez bestekoaren aldean (3,1 Petabyte). WhatsApp aplikazioan erabilitako datuen bolumena %300 baino gehiago hazi da.

Telebistari dagokionez, Euskaltelek egiaztatu du eguneko batez besteko kontsumoa 5,4 ordukoa dela, eta ohi baino %45 handiagoa dela.

Konpainiak adierazi duenez, Euskaltel Taldeko Sistemen eta Sarearen ekipoetako 800 teknikari baino gehiago ari dira lanean «kalitatezko sare bat bermatzeko», eta beren sarea dimentsionatzen ari dira ezohiko trafiko igoera horiek jasateko.

Nolanahi ere, Euskaltelek, gainerako operadoreek bezala, zerbitzu-esperientzia ona izateko, aholkatu du telefono finkoaren erabilera indartzea ahots-deietarako, WiFi sare finkoa erabiltzea Internetera sartzeko eta lankidetza tresnak erabiltzea (Skype, Teams, WhatsApp, etab.) ahots komunikazioetarako.

Horrez gain, fitxategi astunak ez bidaltzea eta horien ordez loturak jartzea, bailarako orduetan fitxategi astunak deskargatzea eta bideokonferentziak egin beharrean audiokonferentziak egitea aholkatu du.