Euskadiko Orkestrak ‘Agur Jaunak’ klasikoaren bertsio berri bat aurkeztu du etxetik

Kontzeptu eraberrituarekin eta kutsu unibertsalarekin, Euskadiko Orkestrak bere elkartasun mezua prestatu du pandemia garaian. Emaitza ‘Agur Jaunak eta Andreak’ da. Musikak, koronabirusak bezala, ez du mugarik.

Naiz|2020/04/08
Loading player...

#EuskadikoOrkestraEtxean ekimenaren baitan, euskal orkestrak leihoa ireki du ‘Agur Jaunak eta Andreak’ izenarekin birbataiatutako klasikoaren bertsio berritua eskaintzeko. Kantu herrikoi hori elkartasunaren eta batasunaren euskal ereserki unibertsal moduko batean bihurtu da. ‘Agur’ hori ez da despedida bat, errespetu eta errekonozimendu agurra baizik. Honela, EOSek, Donostiako Orfeoiak bezalaxe, opari musikala egin nahi izan dio euskal gizarteari.

Azaldu dutenez, EHUk duela urte gutxi berritutako bertsio honen letrak herritar guztien berdintasuna defendatzen du. Zailtasun eta ziurgabetasun garai hauetan, maitasunaren eta guztion arteko elkartasunaren aldeko kantua da hau, eta asmo horrekin aurkeztu eta zabaldu nahi izan du orkestrak.

Bertsio berri hau NDR Elbphilharmonie Orchesterreko (Hanburgo) tronboijole bakarlari Simone Candottok sinatu du. Candotto Alemanian bizi eta lan egiten duen musikari italiarra da eta, Xabier de Felipe bere adiskide euskaldunak lagunduta (Alemaniako orkestran lankide izan ziren biak eta gaur egun De Felipe Euskadiko Orkestrako musikaria da), euskal kultura besarkatu zuen duela bi urte obra honen bertsioa egitea erabaki zuenean.

EOSetik azaldu dutenez, obra berritu honek barne hartzen duen izaera unibertsal eta nazioartekoaren erakusgarri argia da, eta ezin garrantzitsuagoa eta beharrezkoagoa da horrelako mezu bat bizi ditugun garaietan, non musikak, koronabirusak bezala, ez baitu mugarik.

Alemaniako orkestraren sorpresazko bisa

Orain EOSek aurkezten duen ‘Agur Jaunak eta Andreak’-en bertsio hau bis gisa interpretatu zuen duela bi urte Hanburgoko NDR Elbphilharmonie Orchesterrek Musika Hamabostaldian eskaini zuen kontzertuan. Candottok sortu zuen bere orkestrarentzat une hartarako, Xabier de Felipek hala proposatu ostean.

Candottoren ‘Agur Jaunak’ Brucknerren ‘7. sinfonia’-ren elementuetan inspiratuta dago. Bere egileak hala dio: «Wagneriar tubak entzun daitezke sinfonian bezala, eta obra Mi maior tonalitate berean idatzita dago. Biolinen tremoloa hasieran, baita biolontxeloek eta lehen tronpak honen gainean interpretatzen duten motiboa ere, oso antzekoak dira bi kasuetan. Zalantzarik gabe, ‘Agur Jaunak’-en moldaketa honek Brucknerren antzeko ñabardurak erakusten ditu orkestrazioan, harmonietan eta bere koloreetan». Candottok bertsio hori entzun du EOSen eskutik, eta «erabat hunkituta» sentitzen dela dio.

 

 

NAIZ
Loading player...


Koronabirusaren krisiak kaltetutako taldeei laguntza ekonomikoa eman eta euskal musikaren industria babestu eta kulturari egiten dion ekarpena balioan jarri nahi du NAIZ Kontzertuak ekimenak.

Elene CARRETO - FOKU
Loading player...


Konfinamenduaren erronketako bat da geure buruak eta gorputzak zaintzea. Bide horretan, NAIZek zumba saioak eskainiko ditu egunero, astelehenetik ostiralera, Elene Carreto dantzari durangarraren eskutik.