Jean-Dominique Iriart, Larraineko alkateak, Holtzarteko zubia ixtea erabaki du, eta udal ordenantza baten bitartez jakinarazi du horrela egonen dela «kontrolak, urgentziazko mantentze lanak eta egiaztapen lanak egin arte». Larunbatetik goiti hestea deliberatu zuen segurtasun neurriak ezin direla bermatu argudiatuta.
Holtzarte Larraineko udalaren baitan da eta bertako auzapezaren iritziz, «aurreko urteetan baino bisitari gehiago» izateak segurtasun arazoak ekarri ditu. Zubi zintzilikatuaren egonkortasunaz gain, osasun arriskua ere aipatu du hautetsiak, jende kopuru handiak osasun segurtasun neurriak bermatzea zaila egiten baitu.
Kakueta hetsia
Uztailaren 31an emakume bat hil egin zen Kakuetako arroilean luizi baten ondorioz. Geroztik, handik 20 kilometrotara dagoen Holtzarteko zubia Zuberoako inguru horretako toki turistiko nagusia bilakatu da.