BAB (Baiona-Angelu-Biarritz) errepidearen bidez lotzen dituen Tram’Bus zerbitzuarekin batera Car express, Proxi’Bus, bizikleten alokairu zerbitzua edo Aturri ibaiaren gaindi Espiritu Saindua auzoa eta Boufflers etorbidea lotzen dituen itsas-ontzia hartzen ditu bere baitan Txik Txak sareak.

Euskal Elkargoak bilan aski baikorra egin du joan zen urtean indarrean sartu zen zerbitzuari buruz. Hala, inoiz baino bidaiari kopuru handiago erregistratu zuen Tram'Bus zerbitzuak joan zen agorrilean. Orotara 200.000 joan-etorri egin zituen Irizar konpainiak ekoizturiko Tram’Bus garraioak.

Tram'Buseko lehen linea 2018ko urtarrilean inauguratu zuten. Geroztik sarea zabalduz joan da. 2019ko irailaz geroztik 1.734.000 ibilbide egin ditu tranbia eta autobusa artean garraio hibrido mota bat proposatzen duen Tram’Busak.

Osasun krisia tarteko hainbat aldaketa egin behar izan dituzte. Hala nola sms bidezko txartelaren erosketa bultzatu dute Txik Txak-eko arduradunek langile eta bidaiarien artean kontaktu fisikoa ahal den eta gehien murrizteko.

Uztailean jarri zen martxan eta handik honat 15.000 txartel saldu dituzte sistema horren bidez.

Bestalde, bizikleta elekrikoa doan erabiltzea proposatzen duen zerbitzuak gero eta arrakasta gehiago bildu duela nabarmendu du erakundeak. Velibleu izeneko zerbitzuak 17.350 alokairu egin ditu iazko irailetik hona.

Izan ere, ikasturte hasiera honek berrikuntza bat ekarri du. Intermodaliatea sustatuz ibilbidea kalkulatzeko zerbitzua jarri dute martxan. Helbide honen bidez herritarren haien eguneko joan-jinak ahal dituzte antolatu baita denbora kalkulatu ere.

Negurako, berriz, Txik Txak Kovoit’ autoa konpartitzeko aplikazioa eskura jarri nahi du Euskal Elkargoak.

Hala, smartphone baten bidez ibilbide bat ahalko da momentuan erreserbatu geolokalizatzailearen bidez aitzinetik bere bidaia zehaztu duen auto gidariarekin harremanetan jarriz.

Hurrengo erronka litzateke garraio mota bi (esaterako autoa eta autobusa) tartekatuz ibilbideak proposatzea. Betiere garraio kolektiboa edota partekatua bultzatuz.

Donibane-Garazi eta Baiona arteko tren zerbitzua

Horrekin batera, Iparraldeko erakundeak iragarri duenez proiektu bi martxan jarriko dira ondoko hilabeteetan «gertuko mugikortasuna errezago bilakatzeko xedez».

Hala, Jatsu-Larresoron eta Arrosan garraio motaz aldatzeko guneak zabalduko dituzte. Baionan eta Hendaian, berriz, tren geltokia ardatz harturik, eremu intermodal bina eraikitzeko bidean dira.

874.500 euroko buxeta izanen du Donibane Garazi eta Baiona arteko tren ibilbidea bultzatzearekin batera beste garraio mota batzuk proposatuko dituzten aipaturiko guneak eraikitzeko proiekuak.

Garraioa trukatzeko poloa eraikitzeko bidean da Baionan. Horren xede tren geltokiaren kanpoaldeko eremua egokitu eta autobusak gelditzeko parkina eraikiko dute laster. Egungo parkina ere berrituko dute. Orotara 6,5 milioi euroko aurrekontua dauka proiektuak.

Hendaiako tren geltokiari dagokionez, heldu den hilabetean zabalduko dute Elgarrekin mugaz gaindiko mugikortasun gune intermodala. Geltokiaren aurreko gunea moldatuko dute Euskotren geltokia eta Txik Txak sareko zerbitzuen gunea elkartuz. 4,6 milioi euroko buxeta du EAE-Akitania Berria-Nafarroa Euroeskualdearen lehentasunen baitan kokatzen den proiektuak.

Bruselako diru-funtsen laguntzaz eraikiko dituzte Baionako eta Hendaiako geltoki intermodal horiek.