Gizon batek beste bat erasotzeagatik atxilotu zuten atzo. Erasotzailea erasotutakoaren pisukidearen bikotekidea da, eta bi pisukideek –zauritutako gizona eta erasotzailearen emakumea– izandako eztabaida baten ondoren gertatu zen. Egindako zauriengatik, erasotzaileak atxilotua segitzen du, eta emakumea auzipetua dago, nahiz eta aske geratu den.

Segurtasun Saileko iturriek jakitera eman dutenez, atxiloketa atzo goizean izan zen, Basaurin, baina gertakariak joan den astelehen arratsaldean izan ziren, zaurituak Galdakaon hainbat maizterrekin partekatzen duen etxebizitzan, besteak beste, atxilotuaren bikotekidearekin.

Zaurituaren arabera, emakumearen bikotekideak kristalezko edalontzi bat hautsi zion buruan. Konortea erdi galduta lurrera erori zen, eta, ondoren, erasotzaileak ebaki bat egin zion masailean, labana batekin, emakumeak erasotzailea txalotzen eta animatzen zuen bitartean. Zaurituak bere logelan babestu eta Ertzaintzari abisua ematea lortu zuen.

Handik gutxira, agenteak etxebizitzara joan ziren, baina bikotea joana zen. Ikerketa ireki ostean, Ertzaintzak atzo aurkitu zuen erasotzailea Basaurin, eta atxilotu egin zuen. Bikotekidea ikertzen ari dira, gertakarietan parte hartzeagatik.