Hatortxu Rockek argitaratutako prentsa ohar batean, osasun krisi larri honek ohiko elkartasun jaialdia antolatzea eragotzi duela nabarmendu dute. 1999an jaio zen musika jaialdia, euskal errepresaliatu politikoen egoera salatzeko bozgorailu gisa eta dispertsio politikak presoen senideengan sortzen dituen gastu ekonomiko ikaragarriak samurtzeko.

Hala, 21 urte eman dituzte etengabe, abenduro, milaka lagun elkartzen eta, aurten, nahiz eta aurrez aurre ospatzeko aukera baztertu duten, abenduaren 26an Hatortxu Rocken 24. edizioa antolatuko du Hatortxu Rockek. Bakoitzak bere etxetik gozatu beharko duen jaialdia izango da aurtengoa, baina hori da «aldatuko den gauza bakarra».

Izan ere, pandemiak «gehien jipoitutako sektoreetako bi dira gurean protagonista: presoak eta kultura». Horregatik, lanean jarraitzeko beharra «inoiz baino handiagoa» dela azpimarratu dute eta, horregatik, eskaintza «oso berezia» izango dela aurtengoa, «soilik Hatortxu Rock honetan» gozatu ahal izango diren izen, abesti eta ikuskizun ezberdinekin.

Musika izango da protagonista, baina baita kulturaren beste esparruetako erakusleak ere izanen dira. Modu honetan, «hainbeste urtetan gure alboan izan diren musikari guzti horiei haien ahalegina itzuli nahi diegu egoera zail honetan, benetan zerbait berezia taularatuz», gaineratu dute.

Baina «gure izena eta izana» ez dituzte ahaztuko eta, horregatik, gogora ekarri dute koronabirusak «espetxe barruan ere bizitza zaildu egin duela eta, zer esanik ez, senideekiko kontaktua».

Ildo horretan, oraindik 221 euskal herritar espainiar zein frantziar Estatuetako espetxeetan daudela nabarmendu dute, eta, azken hilabeteetan «keinuak ikusi» eta hainbat etxetik gertuago baldin badaude ere, asko eta asko dira oraindik ehunka eta milaka kilometro egin behar dituztenak haien senide edo gertukoak ikusteko.

«Inoiz baino beharrezkoagoa»

Eta, beraz, denak etxean izan arte lanean segi behar dutela adierazi dute. Hori gutxi balitz, gogoratu dute egungo osasun krisiaren aitzakiapean murriztu egin direla aurrez-aurreko bisitak eta ez direla gutxi bidaia luzeak egin ostean bisita egiteko aukerarik gabe geratu direnak. «Beraz, lanean segi behar dugu, eta inoiz baino gehiago segi ere», gaineratu dute.

«Astebururo 1.000 kilometro egiteak suposatzen duten gastuek hor jarraitzen dute eta, aldiz, diru-sarrerak, gehienak herri mugimenduak antolatutako ekimenetatik zetozenak, eten egin dira pandemiak ekimen guzti horiek bertan behera utzi eta gero», azpimarratu dute.

Horregatik, Hatortxu Rock «inoiz baino beharrezkoagoa» dela uste dute eta konpromisoari eusteko beharra ikusi dute, baina ezin dute bakarrik egin.

Aurten internet bidez jarraitu beharko da Hatortxu Rock jaialdia, baina «mereziko duen zerbait eskainiko dutela» adierazi dute, «haiek merezi dutelako».

Hala, datozen egunetan emango dute jaialdiaren inguruko argibide eta berri gehiago. Eta laster izango da sarrera eskuratzeko parada.