Zerrenda luzea da. Gatibu, Zea Mays, Mikel Urdangarin, En Tol Sarmiento, Mäbu, Izaro, Anje Duhalde, Amak, Shinova, Maren, Urtz, EH Sukarra eta Su Ta Gar igoko dira agertokira Ura Bere Bidean ekitaldian. Hitzordua urriaren 22an BECen da.

70eko hamarkadatik gaur egunera arteko kantuen orkestra-bertsioak grabatu dituzte, Fernando Velazquez getxoztarrak konposatuak eta Bilboko Orkestra Sinfonikoak eta Bilboko Koral Elkarteak lagunduta. Proiektuan parte hartuko duten artistek kontzertu bakarra eskainiko dute BOSek eta Bilboko Koralak lagunduta.

Ura Bere Bidean proiektua 2021ean sortu zen, covid garaian «erresistentzia-ariketa» berritzaile gisa. «Pandemiak hainbat sek­toreri eragin zien eta horien artean, bereziki kulturalari. Egoera horretan, Bizkaitik zerbait bakarra eta desberdina sortu nahi izan zen, kultur jarduera sortzeaz gain, denborarekin urteroko hitzordu bihurtu ahal izateko», adierazi dute astelehen honetan egindako aurkezpenean.

«Lehen edizioaren arrakastaren ondo­ren, Euskal Herriko artista ezagunak berriro elkartu dira Velazquezek  bertsio sinfonikoan moldatutako garai guztietako euskal kanta ezagunak jotzeko. Parte hartu duten artista eta taldeen artean, «Anje Duhalde Iparraldeko kantautore beteranoa, 80ko hamarkadaren amaieratik jardunean dauden Su Ta Gar, EH Sukarra edo Urtz bezalako talde historikoak, ibilbide musikal handiena izan duten Bizkaiko talde erreferenteetako hiru, hala nola Gatibu, Zea Mays edo Mikel Urdangarin, Izaro edo En Tol Sarmiento bezalako azken urteetako euskal musikako artista ospetsuak, Bulego edo Maren bezalako balio berriak, Amak tal­dean edo Shinova edo Mäbu bezalako Bizkaiko indie taldeetan bildutako trikipoparen emakume erreferenteak», nabarmendu dituzte.

2021eko abenduan hasi ziren Ura Bere Bidean ekimenaren bigarren edizioa prestatzen, programaren aukeraketarekin eta parte hartu zuten artistekin eta ordutik  Velazquez buru-belarri aritu da aukeratutako gaien berrosaketan. Kantu ho­riek Bilboko Orkestra Sinfonikoak eta bakarlariek grabatu dituzte martxoan eta apirilean eta orain ekoizpen fasean daude.

Aurreikuspenen arabera, gaiak uztailaren amaierarako egongo dira eskuragarri eta gai bakoitza astean behin estreinatuko da. «Iaz bezala, 360º teknologiarekin grabatu da proiektua, mur­giltze-kontzertu txikien prototipoak egiteko eta etorkizuneko metabersoaren barruan bide berriak irekitzeko», zehaztu dute.

20.00etan hasiko da kontzertua BECen. Maiatzaren 9tik aurrera, Ura Bere Bidean ekimenaren lehenengo edizioan parte hartu zu­tenek izango dute sarrerak erosteko aukera, proiektua gauzatu izana eskertzeko. Sarrerak maiatzaren 25ean jarriko dira salgai www.uraberebidean.eus webgunean.

Partiturak

Ura Bere Bidean 22 proiektuaren berrikuntzetako bat da aurten abesbatzentzako aukeratutako gaiekin partitura murriz­tuak egingo direla abesbatza taldeen eta musika irakaskuntzako ikastetxeen artean zabaltzeko. Fair Saturday fundaziotik azpi­marratu dute «proiektuaren barruan garrantzi handia duela dibulgazioak, ez bakarrik musika gaiak, baita partiturak ere, ahalik eta jende gehienarentzat eskuragarri izan dadin kultur ondarearen sorkuntza hori».

Ura bere bidean proiektuak elkargune izan nahi du. Hala nabarmendu dute. «Musi­karen industriak bilakaera azkarra duen eta mundu globalizatu batean modak inertzialki gertatzen diren garai honetan, norbera­ren sustraiak eta gatozen tokiak ahazteko arriskua dago. Zentzu horretan, parte hartzen duten artistek omenaldia egingo diete eta errespetuz berrinterpretatuko dituzte eurentzat bereziak diren gaiak, proiektua belaunaldien eta euskal musikaren esti­loen elkargune zirraragarria bihurtuz».