Donostiako Aquariumak Irene Larrañaga Arruti argazkilariaren ‘Insuladas’ argazki erakusketarekin hasi du aurtengo erakusketen denboraldia. Erakusketa itsasoan barrena besteen bakardadera eta norberaren bakartasunera bidaia-proposamena da. Erakusketa ‘irla’ diren eta irla batean bakarrik bizitzea erabaki duten emakumeekin izandako argazki topaketen emaitza da.

«‘Insuladas’ erakusketa argazki-kartografia bat da, konkistatutako bakardadean bizi diren eta, aldi berean, hauskortasuna sororitatearen bidez orekatzen duten emakumeak erretratatzetik sortu da. Erretratu sorta, beti ere zuri beltzean, argazki saioen ondoren sortutako eta topaketa horietan bizitakoa islatzen duten paisaien argazkiekin osatzen da, nolabait, protagonista ere baden uharte batean», adierazi dute Aquariumetik. Beste edozein leku izan litekeen arren, Larrañagak Formentera irla aukeratu du proiektu hau egiteko, azken bost urteetako bidaietan sortua, eta dozenaka emakume erretratatu eta elkarrizketatu ondoren. Fokupean jarri diren emakume guztiek erantzun diote galdetegi bati, eta haien lekukotza batzuk erakusketan aurkezten den proiekzio batean jasotzen direla.

Azken batean, ‘Insuladas’ askatasunaren eta sororitatearen eta bakoitzak bere burua definitzearen kantu bat da, ez bizitzako une bakoitzean ondoan duenari dagokionez, baizik eta bere buruari dagokionez.

Martxoaren 12ra arte bisitatu ahal izango da Nautilus Aretoan, astegunetan Aquariumaren irekiera-ordutegian (asteartik ostiralera 11.00etatik 19.00etara). Horrez gain, erakusketa aretoa espreski zabalduko da, 17.00etatik 19.00etara larunbatetan eta 11.00etatik 13.00etara igandeetan. Sarrera doan da.

Argazkigintza ikasketak Bilboko Argazkigintza Garaikideko Zentroan (CFC) egin zituen Irene Larrañaga Arrutik. Hainbat erakusketa kolektibotan parte hartu du eta ‘Insuladas’ proiektua BAFFEST argazki-jaialdiko finalista izan da bere azken edizioan, 2022an.