Idazleen Biltzarrak haur eta gazteak hartuko ditu bidelagun Ikusi Mikusi azokarekin

Data

21.10.08 - 21.10.11

Lekua

Lapurdi - Sara

Sarako Idazleen Biltzarrean adin guztietako irakurleentzako agerkariak badira. (GUILLAUME FAUVEAU)

Pandemiak gauza anitz aldatu ditu, horien artean Sarako Idazleen Biltzarreko datak, aurten urriaren 10 eta 11n eginen baita apirilean ospatu ohi den hitzordu historikoa. Baina ez da hori aldaketa nagusia izanen, belaunaldi berriei tokia eginen baitie lehen aldiz ospatuko den azoka baten bitartez. Ikusi Mikusi euskarazko haur eta gazte literaturaren bilgune bilakatuko da hilaren 8an eta 9an, Sarako herrian zehar eginen den azoka ibiltariari esker, eta lau egunez literaturaz, idazlez eta irakurlez betez Lapurdiko herria.

«Bi hitzordu elkartu ditugu, eta lau egun osoko programazio aberatsa lortu dugu» baieztatu du pozik Jean-Michel Garatek, Biltzarreko zuzendariak, formato berriari buruz. Idazleen Biltzar historikoa duela urte batzuk eraldatzen eta berritzen hasi zen, Bazko astelehenean publiko zabalari irekitzen zaion betiko datari egun bat gehituz. Duela bi edizio bigarren eguna profesionalei zuzenduriko jardunaldiek osatzen dute.

Urte honetatik goiti beste bi egun gehituko zaizkio, Ikusi Mikusi azokaren bitartez. Hor ere bi egun mota izanen dira, ostirala eskolen eguna izanen da, eta larunbata publiko osoari zabalduko zaio.

Euskal Herri osoko hezkuntza zentroetako ikasle eta irakasleak gonbidatuak izan dira, baina pandemia dela eta, Nafarroa Garaiko bi eskoletakoak kenduta, beste guztiak iparraldeko hiru lurraldeetakoak izanen dira.

Saran literaturari eskainiko zaizkion lau egunetako ibilbidea 850 ikasle eta irakasle ingururekin abiatuko da, gehiago ere izan zitezken, baina osasun egoera dela eta, eskaera batzuk errefuxatu behar izan dituzte.

«Horretan ikusten da badela betetzera heldu garen eskas bat. Lehen edizioa bada ere, jendea kanpoan geldituko da, ikusten da gogoa badela, eta hori kontuan harturik osasun egoera dela eta Hego Euskal Herrikoak ia ez direla etorri» adierazi du Amaia Hennebutte antolatzaileak eta Kiribil konpainiako presidenteak.

Haur bat liburu bat

Bertaratuko den haur bakoitzari nahi duena erosteko bonoa eman ahal izatea zen antolatzaileek bere buruari ezarritako erroka nagusietako bat, eta hori lortu izanarekin pozik agertu da Hennebutte: «Ez dugu lortu helburu genituen 15.000 euroak izatea, baina diru zama handia bagenuenez, erabaki dugu atxikitzea, eta beste laguntza batzuk horretara bideratzea».

Horri esker sei urte baino gehiagoko haur eta gaztetxoek 15 euro izanen dituzte nahi duten argitaletxeetan dirua baliatzeko. Adin horretatik beherakoentzat 12 eurokoa izanen da, eta ZTK argitaletxean soilik eskuratu ahal izanen dituzte obrak.

Azoka ibiltaria izanen da, Sara guztian zehar gune ezberdinak izanen dira, azokak proposatzen dituen ekimen ugariei harrera egiteko, ikuskizunak, tailerrak, erakusketa…

Idazle eta ilustratzaileekin topaketak izanen dira bi egunetan. Tailerrak antolatuak dira, eta adin ezberdinetako ikuskizunak ere. Azken hauek soilik ordaindu beharko dira, 3 eurotan izanen da sarrera, beste eremu guztietara sartzeko urririk izanen da.

Azoka Galtzagorri elkartea, Kiribil konpainia eta Pamiela argitaletxearen eskutik heldu da, Euroeskualdearen hiru lurralde administratiboetatik helduak, horrek suposatu duen finantziazioari esker abiatu baita proiektua.

Idazleen Biltzarra

Lau egunetako jardunaldi literarioen jatorri den Biltzarran, Euskal Herriko idazleekin trukatzeko parada izanen da. Orotara 77 mahai izanen dira, gehienetan idazleek hartutakoak dira, besteetan argitaletxe edo argitalpenak ere badira.

Tradizioari jarraituz aurkezpenak eta omenaldiak izanen dira 10:00etatik 16:30etara. Hala ere, Garatek argi utzi duen bezala, «beti gauza berriak dira Biltzarrean», eta horrela izango da aurten ere azken berritasunak bertan deskubritu ahal izanen direlako.

Berritasunetako batzuk, historiari begira jarriko dira, horien artean dago Txomin Hiriart Urrutyk idatzi duen ‘Anai artea’ obra, izen bera daraman elkartearen ibilbideari begiratzen diona. Francoren garaian Hego Euskal Herritik heldu ziren errefuxiatuei laguntzeko xedea duen talde sortzaileko kide batzuk hurbilduko dira 11:30etan eginen den aurkezpenera.

Oren bat beranduago ‘Quand nous chantions sous Franco’ liburua aurkeztuko dute, non garai frankistako kantari euskaldun ospetsuen ibilbidea kontatzen duen Colette Larraburuk. Liburuan mintzagai diren abeslari batzuk ere izanen dira bertan.

Ondoren, bi hitzorduetako kideak elkartuko dira publiko aitzinean, Anai Artea elkarteari omenaldia egingo baitzaio, eta horretan parte hartuko dute diktadura garaian askatasunari kantatu zioten abeslariek.

Profesionalen egunen ‘Emazteak eta euskal literatura’ gaia jorratuko da, non aurkezpenak, mahai-inguruak eta bi obra artistiko ere eskainiko diren. Bertara argitaletxeetako, liburu dendetako, liburutegietako langileak, kulturgileak, idazke, irakasleak… gonbidatuak dira.

Kokapena

Sarako Jean Aniotzbehere
salle Jean Aniotzbehere
Sara. Lapurdi