Luis de Castresana jaio zenetik mendea bete denean asteazken honetan, hainbat ekitaldi antolatu ditu Trapagarango Udalak maiatzaren 13a bitartean hainbat elkarteren laguntzaz.

Idazle, eleberri egile, kazetari eta margolaria Trapagarango Ugarte auzoan jaio zen 1925eko maiatzaren 7an. 1986ko uztailaren 17an hil zen Basurtun. Egile emankorra, batez ere, ‘El otro árbol de Guernica’ eleberriagatik da ezaguna, harekin irabazi baitzuen Literaturako Sari Nazional espainiarra, ondoren zinemarako moldatu zena.

Lan autobiografikoa da. 36ko Gerran, euskal ume batzuk Belgikara bidaliak dira bonbardaketa eta sarraskietatik urrun izateko. Herrialde eta familia berrietara moldatu behar dira baina helburu bakarra dute: etxera itzultzea. 

Zabalik ditu ateak Castresanaren objektu pertsonalak, liburuak, koadroak, marrazkiak, prentsa artikuluen ebakinak... bildu dituen erakusketa. Maiatzaren 13ra arte ikusi ahal izango da.

Asteazken honetan da egun nagusia. Montpellier-ko Frantsizkotarren Ikastetxeko ikasleek ‘Otro Árbol de Gernica’ irakurtzen ari dira etengabe 08.00etatik 17.30era, bere instalazioetan. Irakurketa zabalik dago publikoarentzat eta zenbait gonbidatuk parte hartuko dute.

Arratsaldean, 18.00etan, Olaso Jauregian hitzaldi bat eskainiko da egitearen bizitzari buruz eta José Luis Robertsonek ‘Recordando al escritor olvidado’ liburua aurkeztuko du.
 
Maiatzaren 4an, Ugarte auzoan bertan idazlearen inguruko bizitza eta obrari buruzko kontakizun laburrak irakurri ziren.

«Ez zen ahaztuta utzi behar Pedro Lazaga zuzendariak haren eleberri ezagunenaren zinemarako egin zuen moldaketa», esan dute udaletik. ‘El otro Árbol de Guernica’ maiatzaren 9an eskainiko da da 18.00etan La Escontrillako Balio Anitzeko Aretoan.  

Proiekzioaren ondoren, Jose Luis Robertsonek eta Roberto Utrillak, Ortuellako Mesa de la Memoria Elkartekoek, hitzaldi bat emango dute.

Programazioa ixteko, igandean, maiatzaren 10ean, 12.00etan, lore-eskaintza eta aurreskua (Danetarako Danok) egingo da idazlearen hilobian, Zugaztielako hilerrian.

Ekitaldietarako sarrera librea da.