Sendavivak denboraldi berria hasiko du martxoaren 19an, ohiko proposamenarekin
Sendavivak martxoaren 19an irekiko du 23. denboraldia, San Jose egunarekin batera. Data horri esker, parkeak lau egunez jarraian irekiko du, ostegunetik igandera. Arduradunek aurreratu dutenez, ohiko aisialdi eta natura proposamena mantenduko dute.
Sendaviva parkeak denboraldi berriari hasiera emango dio publiko guztientzako ohiko aisialdi eta natura proposamena mantenduz, gune tematikoak (herria, etxaldea, aintzira...) eta bere atrakzio nagusiak irekiz: Sugeen lubakia, Bosbleigh edo Jatorria, besteak beste.
Aurten parkeak ingurumen hezkuntzara eta kontzientziaziora bideratutako jarduera berriak izango ditu, denboraldian zehar iragarriko direnak. Gainera, aurreko urteetan bezala, parkeak udan –ur-atrakzioak protagonista dira–, Halloween eta Gabonetan banatuko du denboraldia.
Era berean, parkearen ezagutzarekin, bertako profesionalen lanarekin eta Sendaviva eta Bardeako ingurune naturalarekin lotura handiena duten programak eskainiko dira: Sendanatura eta Ibilaldi Naturalistikoak.
Sarrerak eta deskontuak
Denboraldi berrirako sarrerak eskuragarri daude Sendaviva.com webgunean eta NICDO sozietate publikoak La Morea merkataritza-gunean duen leihatilan eta informazio gunean.
Helduen sarrerak (12 eta 64 urte bitartekoak) 32 eurotik gorako prezioa du; junior eta 65 urtetik gorakoenak berriz, 24 eurotik aurrerakoak dira. 5 urtetik beherakoak doan sartu ahal izango dira parkera.
Sendavivak deskontuak mantenduko ditu erosketa aurreratuetan, gestioaren aurrerapenaren arabera. Gainera, La Moreako NICDOren saltokian erositako sarrerek 3 euroko deskontu gehigarria dute.
Aste Santuko kanpalekuak
Eskolako oporrak direla eta, Sendavivak Aste Santuko kanpalekuak antolatuko ditu apirilaren 7tik 10era bitartean, ‘Sendaviva Espedizioa: Lur Planetako Esploratzaileak’ izenarekin, 6 eta 13 urte bitarteko haurrei zuzenduta.
Kanpamentuek naturarekiko kontaktua, ingurumen-hezkuntza eta planetaren kontserbazioa izango dituzte ardatz, adin bakoitzari egokitutako jolas, dinamika eta jardueren bidez.
Parkeak bi modalitate eskainiko ditu: batetik, eguneko kanpamentua, 09:30etatik 18:00etara, eguneroko garraioarekin Tuteratik; eta, bestetik, egonaldi kanpamentuak, astelehenetik ostiralera, pentsio osoko erregimenean, esperientzia osoagoa bizi nahi dutenentzat. Bi modalitateak gaztelaniaz eta euskaraz egongo dira eskuragarri, bi kasuetan ingelesezko jarduerekin.
Udalekuetarako izen-ematea zabalik dago Sendavivako web orriaren bidez. Bertan, indarrean dauden modalitate, prezio, baldintza eta sustapenei buruzko informazio guztia kontsulta daiteke.