Iratzargailuak jo du gaur ere, errutinari eusteko ahaleginean hori baita oinarrietako bat. Eta orain zer? Duela hilabete, erantzun automata motxila hartu eta kiroldegira joatea litzateke, egunari hasiera emateko endorfina dosiaren bila. Gaur ez da posible izango. Edo bai? Konfinamenduak irudimena bide berriak urratzera eraman du, premisa argi batekin: gorputzaren beharrei erantzun egin behar zaie. Beraz, zapatilak soinean hartu eta martxan jarri gara.

Bidelagunak topatu ditugu horretarako. Teknologia eta sareen garaiotan etxean konfinatuta egoteak ez du isolatuta gaudenik esan nahi. Salto enpresako entrenatzaileek ongi dakite hori eta etxean daudenei jarduera fisikoa egiteko aukera erraztu nahi diete. Hala, sare sozialak tresna gisa hartuta bi helburu jarri dituzte: jendeak ariketa fisikoa egiteko gida interaktiboa eskura izatea eta jarduera hori taldean egiteko bidea zabaltzea.

Horretarako, egunero erronka bat jartzen dute sare sozialetan, euren jarraitzaileek etxean egin dezaten. Bide batez, erronkara batzen diren gainerako parte hartzaileekin elkar eragiteko aukera daukate, bakarka ere egin daitekeen entrenamendua den arren. Sareetara ordubeteko bideo batean igotzen dute –Salto Home Personal Training Facebooken eta salto_training Instagramen– eta zuzeneko saioa egiten dute goizero.

Sozializazioa eta gorputza zaintzea

Ekimen honek koronabirusaren krisiaren erdian eta konfinamendu egoeran izan dezakeen garrantziaz galdetu diegu Jurgi Fernandez eta Unai Jorge Salto-ko arduradunei. Interakzioaren alderdia nabarmendu dute biek, bakardade sentimendutik ihes egiteko. «Zuzeneko bideoan taldekideek parte har dezakete, zalantzak, arazoak eta iritziak plazaratuz. Aukera desberdinak eskaintzen dizkigu. Guretzat garrantzitsuenetako bat taldekideen arteko interakzioa da, iruzkinak eginez, erronken argazkiak edo grabaketak igoz… Garai zailak dira eta tresna honek gure burua bizi dugun errealitatetik atera dezake eguneko ordu batzuetan».

Gure osasuna zaintzeko orduan jarduera fisikoak duen garrantzia aipatu dute. «Adituek esaten duten moduan, XXI. mendeko pilulatzat har dezakegu jarduera fisikoa». Eta adibide ugari jarri dizkigute. Gaitz ezberdinak ekiditeko –hipertentsioa, diabetesa, gehiegizko pisua…–, gaitasun fisiko ezberdinak indartzeko (masa muskularra, sistema immunologikoa, gaitasun aerobikoa…) eta osasun psikologikoa hobetzeko oinarrizkoa da. Bizi dugun krisi honen erdian, esaterako, autoestimua indartzen laguntzen du, endorfinen isurketa ahalbidetzen du eta antsietatea edo estresa gutxitzen laguntzen du.

Kontuan izanda egoera honetan bai espazio zein material aldetik muga asko dauzkagula aire zabalean edo kiroldegi batean egiten dugun jarduera fisikoa egiteko, irudimena erabiltzea eta praktikoak izatea da gomendioa. Etxean ere topa ditzakegu beharrezko tresnak. «Jarduera fisikoa etxean egin behar dugu orain, material bereziak erabiliz eta espazio murritz batean. Honek ikuspuntua aldatzera behartzen gaitu eta, gure gorputzaren pisua eta etxeko zenbait tresna oinarritzat hartuz (komuneko papera, ur botilak, ur garrafak, erratzaren makila, zartaginak, liburuak…), lan ezberdinak egin ditzakegu, indar lana, lan metabolikoak, core, mugikortasuna…», azaldu digute.

Gomendioak eskatu dizkiegu egun hauek ahalik eta ondoen eramateko. Errutinak eta ordutegiak ezartzea funtsezko ikusten dute. «Noiz esnatu behar garen finkatu beharko genuke eta etxetik lan egin behar badugu, lanerako ordutegi itxi bat eduki, lanaldia ez luzatzeko, hau arriskutsua izan daiteke eta», adierazi dute. Elikadura zaintzea ere ezinbestekoa da noiz eta zer jan behar dugun planifikatuz. Eta noski, aisialdirako ere denbora gorde eta ordenatu. «Gomendio hauek gure gorputza eta gure burua zaintzen lagunduko digute eta egunak modu errazago eta osasuntsuago batean eramango ditugu aurrera», gaineratu dute. Nahi duenak, hortxe dauka erronka.