Baskonia-Alaves taldeak sustatzen duen European University Gasteiz (Euneiz) unibertsitate pribatua sortzeko legeak izapidetzen jarraituko du Gasteizko Parlamentuan, atzo arau horren irizpena onartu baitzen. Irizpen hori osoko bilkuran aurkeztu zen eta PP+Cs eta Vox-en aldeko botoak izan zituen. Aitzitik, Elkarrekin Podemos-IU eta EH Bildu aurka agertu ziren.

Koalizio abertzaleak aurka bozkatu zuen, unibertsitate horrek erakunde publikoen dirurik ez duela jasoko bermatzeko aurkeztu zituen zuzenketak baztertu ondoren. Jakinarazpen batean, taldeko parlamentari Ikoitz Arresek adierazi zuen «EAJ eta PSE garaiz daudela oraindik euskal unibertsitate sistemaren finantziazio publikoa blindatzeko; garaiz daude, legea osoko bilkuran eztabaidatu eta onartu bitartean, gure zuzenketak onartzeko». EH Bilduko legebiltzarkideak azpimarratu zuenez, «hezkuntzaren esparrua, oinarrizko eskubide den aldetik, ezin da enpresen onuraren eta irabazi asmoaren esparrua izan, eta, betiere, helburu horiek dituzten proiektuak ezin dira inola ere funts publikoen bidez finantzatu». Ildo horri jarraituz, «gure helburua Euskal Unibertsitate Sistemaren Legea aldatzea da, etorkizunean unibertsitate sistema eta unibertsitate publikoaren finantziazioa blindatzeko, irabazi-asmoa duten unibertsitate pribatuen mehatxuen aurrean. Hau da, ez Euneiz, ez etorkizunean ezarri nahi den irabazi-asmoko beste unibertsitate pribatu bat ere, ez dadila EAEko Unibertsitate Sisteman sartu, eta, beraz, horrelako unibertsitateek ez dezatela finantziazio publikoa eskuratzeko inolako aukerarik izan».

Proiektuaren testuak EAEn egoitza duen unibertsitate pribatu gisa aitortzen du Euneiz, eta honako ikasketak eskainiko ditu: Osasun Zientziak, kirol-zuzendaritzaren eta berregokitzearen eremuetara bideratuta, eta Teknologia Interaktibo Berriak, entretenimenduaren, bideo-jokoen eta aplikatutako jokoen industriarekin zerikusia duena.

EAJren eta PSEren zuzenketen bidez, hasierako testua egokitu zaio unibertsitateak eta unibertsitate-zentroak sortu, onartu eta baimentzeko errege-dekretuari. Dekretu horrek indargabetu egiten du 2015eko aurrekoa, eta, besteak beste, unibertsitateetako proiektu berriek aintzatetsi ahal izateko bete behar dituzten baldintzak arautzen ditu.

Sindikatuak aurka

Euneizek aurka ditu EHUko LAB, Steilas, CCOO, ELA eta CGT/LKN sindikatuak, baita EHUko Ikasleen Kontseilua eta Ernai erakundea ere. Joan den uztailean, gogorarazi zuten lege-proiektu hori «mugarria izan daitekeela euskal unibertsitate-sistemaren bilakaeran, pribatizazioaren eta merkantilizazioaren ildotik eta unibertsitateko irakaskuntza eta ikerkuntzaren zerbitzu publikoaren izaeraren kalterako».

Ekainean jakinarazi zen, halaber, Arabako Foru Aldundiak 480.000 euro emango dizkiola Baskonia-Alaves taldeak bultzatutako unibertsitateari; Gasteizko Udalaren kopuru bera, hain zuzen ere.