Maite UBIRIA
LUHUSO
IPAR EUSKAL HERRIA BLOKEATZEKO DEIA

Ipar Euskal Herri «osoa» geldituko da Estatuaren blokeoa deslotzeko

Ion Paroten askatasun auzian Fiskaltzak aurkezturiko helegitearen berri izan ondoren, Bake Bideak uztailaren 23an Ipar Euskal Herria blokeatzeko erronka finkatu zuen. Atzo eman zuten ekintzaren berri. «Komunikazio bide oro geldiaraziko da» helburu argi baten alde: «Prozesuaren blokeo judizial eta politikoari blokeo geografiko batekin erantzunen diogu».

Barrikada itxuran girotu zuten Bake Bideko kideek Luhusoko plaza.
Barrikada itxuran girotu zuten Bake Bideko kideek Luhusoko plaza. (Guillaume FAUVEAU)

Barrikada gisa -“Orain presoak” adreiluzko murruan idatzita, bidoiak- itxuratu zuten atzo Bake Bideko bozeramaileek Luhusoko plaza, uztailaren 23rako prestatu duten mobilizazio egunaren berri emateko. Tresna horiez baliatuko dira egun horretan «Ipar Euskal Herri osoa blokeatzeko», hain zuzen, Gobernu frantsesari euskal presoen auzia desblokeatu dezan exijitzeko helburuarekin: «Prozesuaren blokeo judizial eta politikoari blokeo geografiko batekin erantzunen diogu».

«Tentsioa sortuko dugu, arreta erakartzeko», aurreratu zuen atzo eguerdiko prentsaurrekoan Jean-Daniel Elichiryk. Ekintza «erabakigarria» izango dela nabarmendu zuen: «Erabakigarria, izango duen hedaduragatik, egun osoko iraupenagatik eta lurralde osoan gauzatuko delako».

Ipar Euskal Herriko «komunikazio bide oro geldiaraziko da», zehaztu zuen Bake Bideko bozeramaileak. «Informazio oro jarriko dugu herritarren eskura egun horretan komunikazio bideetako zirkulazio guztia ekiditeko», esan zuen. Bake Bideak aurreratu zuen, halaber, jadanik «ehunka pertsonak» eman dutela izena uztailak23juillet@gmail.com helbidean ekimen masiboan parte hartzeko.

Pertsona horientzat, hamar hitzordu finkatu ditu Bake Bideak, blokeoa ahalik eta antolatuen gauzatzeko: Baionako Herriko Etxean 10.00etan; Baionako Marouette aparkalekuan 10.00etan; Biarritzeko geltokian 10.30ean; Bidarteko Uhabia hondartzako aparkalekuan 10.00etan; Ziburuko pilota plazan 10.30ean; Pausuko Xaia ostatu ondoko aparkalekuan 10.00etan; Azkaineko pilota plazan 10.30ean; Ezpeletako merkatu estalian 10.00etan; Donibane Garaziko Jai Alain 10.00etan eta Mauleko geltokian 10.00etan.

«Bake prozesuaren etapa saihetsezina eta banaezina den presoen askapenaren inguruan iritzi publikoa, komunikabideak eta Frantziako botere politikoa mobilizatzeko, uztailaren 23an Ipar Euskal Herri osoa blokeatzea erabaki dugu», berretsi zuen Bake Bideak Luhuson.

Parot eta Esnalen kasuak.

Gobernu frantsesaren blokeoa Ion Parot eta Jakes Esnal presoen kasuetan gorpuzten da Bake Bideko kideen iritziz. «Ion Parotek eta Jakes Esnalek askatasuna berreskuratzea posible zen, ekainaren 9an lehenaren kasuan eta ekainaren 15ean bigarrenaren kasuan. Horren ordez, emaitza positibo baten ziurgabetasunak bere horretan jarraitzen du, eta hori Ministerio Publikoaren ezezkoaren ondorio da, Zigorrak Aplikatzeko Ganberako magistratuen onarpenarekin gainera», hartu zuten gogoan.

Estatuari «itsutasuna» leporatu zioten, ez duelako kontuan hartzen Euskal Herriko testuinguruaren «bilakaera positiboa». Bi presoak «epe laburrera askatzeko aukera guztiak baztertzeko borondateak justiziatik biziki urrun diren motibazioak erakusten ditu, Estatuaren mendekuarenak», salatu zuten.

Ostera, Elichiry zuzen mintzatu zitzaion Emmanuel Macron Frantziako presidenteari: «Macron jauna, jabetu zaitez Euskal Herriko herritarrek zure kontsiderazio falta sentitzen dutela, zure immobilismoa egiazko umiliazio gisa bizi dutela. Umiliazio hori belaunaldiz belaunaldi transmiti daiteke, benetan prest al zara arrisku hori kontzienteki hartzeko?». Are, Euskal Herriko bake prozesuaren aitzinatzearen edo blokeatzearen ardura Macronek duela berretsi zuten prentsaurrekoan.

Presondegian segitzera behartuta.

Ekainaren 16an jakinarazi zuen Bake Bideak Ion Kepa Parot presoak aurkezturiko eskaerari buruzko erantzuna.

Pariseko Zigor Aplikaziorako Auzitegiak euskal presoaren baldintzapeko askatasun eskaera onartu bazuen ere, ohikoa duen blokeo jarrera hartuta, Fiskaltza Antiterroristak (PNAT) helegitea ezarri zuen. Ondorioz, epaileak harturiko erabakia ez zen gauzatu eta dagoeneko 32 urte espetxean daramatzan lapurtarrak Mureteko presondegian segitu beharko du gutxienez bere defentsak aurkezturiko helegitea aztertu eta Dei Auzitegiaren erabakia jakin bitartean. Atzoko agerraldian Bake Bideak jakinarazi zuenez, uztailaren 21ean egingo da Ion Paroten dei audientzia, Jakes Esnalenaren egun berean.

Deliberoa ezagutu bezperan, Baionako suprefeturaren aurrean elkarretaratzea egin zuen Bake Bideak. Ipar Euskal Herria blokeatzeko aukera aitzinetik aipatua izan bazen ere, orduan iragarri zuten bake eragileek uztailaren 23an desobedientzia ekimen handia egiteko erabakia.

Mobilizazio segida.

Otsailean 18an suprefeturaren aurrean eginiko blokeoarekin abiatu zuten bake eragileek joan zen urtarrilaren 8ko manifestazioaren amaieran Baionan iragarri zuten «ekintza indartsu eta determinatuagoz» osaturiko etapa berria.

Biarritzeko zerga etxean eta A63 autobidean eginiko ekintzak heldu ziren horren ondotik, eta iragan maiatzaren 22an Baionako Auzitegia blokeatu zuten bakegileek Fiskaltza Antiterroristak atxikitzen duen jarrera hetsia salatzeko.

Argudio berberaren karian kokatzen dute eragileek U23ko mobilizazioa.