Barack Obama presidente estatubatuarra eta Dalai Lama Etxe Zurian elkartu ziren atzo.

Gobernu txinatarrak bere haserrea helarazi zion Washingtoni. «Gure kezka serio kontuan hartzeko eskatzen diogu eta aurreikusitako bilera hori lehenbailehen bertan behera uzteko», plazaratu zuen Atzerri Ministerioak agiri batean. «Txinaren politikan esku-sartze zakarra da. Biziki haserre gaudela jakinarazi diegu», nabarmendu zuen.

Ohiko agerraldi batean, Txinako Atzerri bozeramaileak, Hua Chunyingek, esan duenez, «Dalai Lamak erlijioaren aitzakiapean denbora dezente darama erbestetik Txinaren kontrako ekintza separatistak gidatzen. Ekimen mota horiei inolako babesik ez emateko eskatzen diogu Washingtoni. Obamaren eta Dalai Lamaren arteko elkarrizketak nazioarteko harremanen arauak urratzen ditu».

AEBetako Gobernuak badaki bilera tentuz ibiltzeko gaia dela. Horregatik, ez du hedabideak bertan izatea baimendu eta Segurtasun Batzorde Nazionalaren bozeramaile Caitlin Haydenek argi utzi nahi izan zuen Obama Dalai Lamarekin nazioartean aitortza duen lider erlijioso gisa elkartuko dela. «Tibet Txinaren eremua da. Guk ez dugu Tibeten independentzia sostengatzen», nabarmendu zuen.

Agintari txinatarrei Dalai Lamarekin edo bere ordezkariekin «eskualdean tentsioa murrizteko aurrebaldintzarik gabe hitz egiten jarraitzeko eskatu zien» Haydenek. Une honetan, bi herrialdeen arteko harremanak ez daude bere onenean. John Kerry Estatu idazkariak «gardentasun» handiagoa exijitu zion joan den astean Pekini honek Ekialdeko Txinako Itsasoan «aire defentsarako identifikazio eremua» ezarri ostean. Alde bakarreko erabaki horrek tentsio handiak eragin zituen bai Ameriketako Estatu Batuekin, baita Japoniarekin ere.