NAIZ.INFO
DONOSTIA

Eneko Ibarguren: «Ziegan sentitu dugu Euskal Herriaren berotasuna eta horrek lagundu digu»

Auzitegi Nazional espainolean deklaratu ondoren libre geratu den Eneko Ibarguren azpeitiarrak elkarrizketa eskaini dio Infozazpi Irratiari. Ondo baina «nahiko nekatuta» daudela esan du eta Herriraren aurkako sarekadak Euskal Herrian eragin duen elkartasun uholdearen berri ere izan dutela adierazi du. «Geunden ziegetan sentitu dugu berotasun hori eta horrek lagundu digu», kontatu du.

Eneko Ibarguren, aske geratu ondoren. (@albertopradilla)
Eneko Ibarguren, aske geratu ondoren. (@albertopradilla)

Eneko Ibargurenek Infozazpi Irratian esan duenez, ez zuten espero Eloy Velasco epaileak aske uztea eta «nahikoa sorpresa» izan dela aitortu du. Goizean zehar, epailearen aurrean deklaratu ahala, bakarren bat kalera joan zitekeela ikusi dute, baina «ez genuen espero gehienak» aske gelditzea.

Ondo daudela esan du azpeitiarrak, baina «nahiko nekatuta». «Orohar ondo eraman ditugu egun hauek», ziegetan elkarrekin egoteko aukera izan dute eta jakinaren gainean ziren nortzuk zeuden atxilotuta. Hori bai, senide eta lagunengatik kezkatuta egon direla aitortu du.

Herriraren aurkako sarekadak Euskal Herrian eragin duen elkartasun uholdearen berri ere izan dutela nabarmendu du. Abokatuen bidez jakin dute, eta «bihotzez» eskerrak eman dizkie denei, erakunde nahiz norbanakoei.

«Geunden ziegetan sentitu dugu berotasun hori eta horrek lagundu digu», azaldu du.