Preso eta iheslarien aldeko konpromiso eta praktikan oinarrituko den dinamika aurkeztu du Ernai gazte antolakundeak, hauek gatazkaren konponbideari begira «ezinbesteko agente« direla ulertzen baitu. Hala, ‘Denok ala inor ez’ dinamikaren berri eman du.

Gazteri osoari zabalduko dioten tresna dela azaldu du Aitor Anda antolakundeko bozeramaileak prentsaren aurrean, «herriz herri garatzekoa eta formatu ezberdinak barnebiltzen dituena». Ildo horretan, kaleak praktikaz bete nahi dituztela gaineratu du, «presoen borrokak kaleratuz, gure aldarriak ezagutaraziz, iheslarien egoeraren berri emanez...».

Era berean, konpromiso txikiak hartzera gonbidatu du gazteria, hala nola, preso eta iheslarien senideei bidaietan lagunduz, gutunak idatzi eta bixitak egitera animatuz, aldarriz jositako kamisetak, banderolak, pinak eta abar eramatera bultzatuz... «Hamaika modu daude norberak bere ekarpena egiteko. Garrantzia ekarpen hori egin gabe ez geratzean datza», adierazi du.