NAIZ

Bardeetako tiro eremua desegiteko eskaera Kongresura eramango du EH Bilduk

Bardeetako tiro eremua desegiteko eta behin betiko ixteko eskaera espainiar Kongresura eramango du asteazken honetan EH Bilduk. Margarita Robles Defentsa ministroari interpelazioa egingo dio Bel Pozueta diputatuak, ariketa militarrak iragarri dituzten egun berean.

Ariketa militarrak Bardeetan. (Jagoba MANTEROLA/FOKU)
Ariketa militarrak Bardeetan. (Jagoba MANTEROLA/FOKU)

Bel Pozueta EH Bilduko diputatua Margarita Robles Defentsa ministroari zuzenduko zaio asteazken honetan espainiar Kongresuko kontrol saioan, Bardeetako tiro eremua desegiteko eta behin betiko ixteko eskaeraren inguruan. Egun horretarako, hain zuzen ere, tiro eremuan ariketa militarrak egingo dituztela iragarri du Bardeako Komunitateak.

«Bardeako tiro eremura eta ariketa militarrak egitera bideratzen diren baliabide ekonomikoak gastu soziala handitzera eta pandemiak eragindako beharrei erantzuna ematera bideratu beharko lirateke» EH Bilduko ordezkariaren ustez.

Tiro eremutik gertu bizi diren herritarrek jasaten dituzten zaratek eta dardarek eragindako eragozpenen aurrean neurririk hartuko ote duen galdetuko dio Pozuetak Roblesi: «Jakitun da Defentsa Ministerioa Bardeako tiro eremuaren inguruko bizilagunen artean dagoen egonezinari buruz? Ohartu al da? Ezagutzen ditu urte hauetan guztietan sortu dituen eragozpenak? Besoak gurutzatuta jarraituko du?».

Gogora ekarri duenez, espainiar Armadaren maniobrak ez dira eten Tutera eta Corellako hiriguneetan. «Istripu arriskuak ere bere horretan dirau, azken hamarkadetan tiro eremuari lotuta 30 istripu larri baino gehiago gertatu ondoren».


Koalizio independentistaren iritziz, «behar beharrezkoa da Nafarroako Gobernuak eta Espainiako Gobernuak herriei alternatibak eskaintzea, eskualdeko ekonomia suspertzeko plan bat abian jartzea. Bardeek potentzial handia dute ingurumenaren, turismoaren eta jolasaren ikuspegitik. Baliabide horien guztien kudeaketa egokia premiazkoa da, parkea eta bizi dugun errealitate ekonomiko eta soziala errespetatuz», aldarrikatu du.

Bardeak Parke Nazional bilakatzea proposatzen dutenen aurrean, Pozuetak zera uste du: «Espainiako Ejertzitoaren menpe azpiegitura militar bat izatea handikap bat da Bardean. Erabat. Ez da bateragarria parke naturalari balioa emateko helburuarekin. Gaur-gaurkoz, zoritxarrez, parkearen erabilera militarra gainerako erabileren gainetik dago», deitoratu du.

EH Bilduk, bestalde, premiazko jotzen du azalpen «argiak» ematea urte hauetan guztietan tiro eremuan erabilitako materialari buruz eta eragindako gastuei buruz. «Ziurgabetasuna eta gardentasun falta kezkagarriak dira», adierazi du.

Pozuetak Nafarroaren «tradizio intsumisoa» goraipatuko du bere hitzartzean eta nabarmenduko du horrek «bateraezina» egiten duela tiro eremua erabiltzeko erabakia. «Nafarroak argi eta garbi esan zion ezetz Armadan parte hartzeari eta soldaduska egiteari, sentimendu eta borroka antimilitarista nabarmenduz», gogoratu du.