Bilboko itsasadarrean, Zubizuri parean, murgildutako aurpegi handi harrigarri bat agertu zen asteazken goizean. ‘Bihar’ eskultura da, eta itsasgoren eta itsasbeheren menpe dagoen 10 urte inguruko gaztetxo baten burua irudikatzen du. Bisitariei eta gaurko belaunaldiari adi-adi begira dagoen eskulturak eztabaida sortu du herritarren artean.

Horixe da, hain zuzen, BBKren ekintzaren helburua. Ostegun honetan jakinarazi duenez, jendartea «kontzientziatzeko ekintza baten lehen inpaktua» da eta irailaren 30ean jarraituko du. Asmoa «lehiakortasun jasangarrirako ereduak hartzeak duen garrantzia» agerian uztea da.

Itsasadarreko mareen arabera ur gainera ateratzen den eskultura bizia Ruben Orozco Mexikoko artista hiperrealistak egin du. Duela bi urte zeresan handia eman zuen ‘Gura bako bakardadean hildako azken pertsona’ obra, banku batean eseritako 89 urteko emakumearena, egin zuenak hain justu.

Fikziozko film labur bat ere bai

Itsasadarreko eskultura berri hau ‘BIHAR: geroa aukeratu’ fikziozko film laburra aurkezteko modu bat ere bada, neskato bera baita ikus-entzunezkoaren eta eskulturaren protagonista.

Bilboko itsasadarreko mareagora eta mareabeheren bidez irudikatutako denboraren etengabeko bilakaera islatzeko pentsatuta dago `Bihar´ obra. Baina, batez ere, «etorkizuneko belaunaldi oso baten adierazpenarekin konprometitutako» eskultura da. Hartuko ditugun erabakiek determinatuko dute hondoratuta biziko garen ala burua aterata».

Etorkizunaaukeratu.bbk.eus webgunean Bilboko itsasadarreko mareen mapa kontsultatu ahal izango da, eskultura zer ordutan ikusten ahalko den jakiteko. Mareabehera bada osorik ikusten da buru erraldoia, eta mareagoran estaltzen joaten da poliki-poliki.

Film laburra izango da hurrengo urratsa. «Prospektibista eta aditu futuristen eskutik sortutako istorio baten bidez, biharko gizartearen agertoki posible bat nabarmentzen saiatzen da, gure eguneroko bizitzan lehiakortasun jasangarrirako ereduen alde egiten ez badugu», aurreratu dute.

Bihar obra erretxina eta beira-zuntzez egina dago. 120 kilo inguru pisatzen du. Eta 2,50 metroko sakonera, 1,92 metroko zabalera eta 1,69 metroko altuera ditu; hau da, bere adineko, 10 urteko, neskato baten burua baino 11 aldiz handiagoa da. Obra hiru hilabete baino gutxiagotan sortu da, eta 3,5 metroko sakonera eta 3 tonako pisua duen hormigoi eta burdinazko egitura batean dago ezarria.

Duela bi urteko arrakasta errepikatu nahian

Xabier Sagredo Ormaza BBK-ko lehendakariak adierazi duenez, geroa alde batera uztea ez da aukera bat eta horregatik, hurrengo belaunaldiekiko «erantzukizun-sentimendutik» sortu da proiektua. Eskultura honen bidez, jendea identifikatuta sentitzea lortu nahi dugu. «Gogoeta egin dezala ea hartzen dugun erabaki bakoitzarekin hondoratzea ala ur gainean mantentzea aukeratzen dugun».

Bestalde, Ruben Orozcok aitortu du BBK-k erronka planteatu zionean «maitemindu» egin zela ideiarekin. «Inoiz ez nuen pentsatu eskultura bizi bat sortzea. Obra honek jendeari gogoeta egiten laguntzea, eta ‘Gura bako Bakardadean hildako azken pertsona’ obrarekin lortu genuen inpaktu bera lortzea baino ez dut espero», esan du.