Lakuako Gobernuko Lan eta Gizarte Segurantza sailburuorde Elena Perezek astelehen honetan iragarri du ORPren Nazioarteko 22. Kongresuaren (Occupational Risk Prevention) amaiera ekitaldian, Cartagena de Indiasen, datorren urteko Fundazioaren Biltzarra Bilbon egingo dela.

ORP nazioarteko erakundea da, independentea eta irabazi-asmorik gabea, «lan-bizitzaren kalitatea hobetzeko eta enpresen berrikuntza hobetzeko konpromisoa hartzen duena», zehazten du fundazioak bere webgunean.

Azterlanak, bilerak, mintegiak, udako eskolak, kongresuak eta prestakuntza-planak sustatzen ditu, sektore ekonomikoak bultzatzeko eta enpresa-sarearen produktibitatea eta lehiakortasuna eta lan-bizitzaren kalitatea hobetzen laguntzeko.

Aurtengo edizioan, Cartagena de Indiasen, 1.500 parte-hartzaile baino gehiago bildu dira, eta beste hainbeste streaming bidez. Gainera, Amerikako eta Europako gobernu eta adituek parte-hartu dute, besteak beste, lan-erakunde berriak, langileen osasun mentala, ordutegiak, etxetik lantokirako distantziak, elikadura, karbono-aztarnen eta aztarna hidrikoen erabilera eta abusua, produktu kimiko berriak, nano produktuak eta nano materialak, adimen artifiziala eta teknologia berriei buruz eztabaidatzeko.

Kongresuaren amaieran, Perezek jakinarazi du Lakuak ORPri eskaini diola «datorren urtean 23. biltzarra egitea Euskadin, Bilbon, Osalan Laneko Segurtasun eta Osasunerako Euskal Erakundearen sorreraren 30. urteurrenarekin batera eta Laneko Segurtasun eta Osasunaren Munduko Egunarekin bat eginez».

Lakuak lan-arriskuen prebentzioari buruzko kongresu horri buruz egindako iragarpena aurten EAEn gertautako lan istripuetan dagoeneko 30 langile hil direnean iritsi da, LAB sindikatuaren arabera.

Osalanen kongresua

Era berean, sailburuordeak jakinarazi du Osalanek bere kongresua antolatuko duela 2023ko apirilaren 24an eta 25ean, eta kongresu horretan parte hartzera animatzeko aprobetxatu du. «Kongresu horrekin berehala egingo den ORPren Kongresurako motorrak berotuko ditugu, 26., 27. eta 28. egunetan. Horrenbestez, arriskuen prebentzioari buruzko benetako astea osatuko dugu, erakunde seguruak, osasungarriak, jasangarriak eta aipagarriak lortzeko», gaineratu du.

Bestalde, igande honetan emandako hitzaldian, Osalaneko zuzendari nagusia dn Lourdes Iscarrek 2021-2026 Laneko Segurtasun eta Osasunerako Euskal Estrategia aurkeztu zuen, eta administrazioentzat eta Lakuarentzat konpromisoak ezartzen dituen heinean duen garrantzia azpimarratu zuen; eta, horretarako,« enpresa-erakundeen, sindikatuen, prebentzio-zerbitzuen eta erakundeen eta langileen parte-hartzea» behar dela zuen nabarmend, «lan- arriskuen prebentzioan parte hartzen duten eragile guztien integrazioa sustatuz».

«Hori guztia, laneko arriskuen prebentzioa hobetzen eta langileen osasuna babesten lagunduko duten ekintzak planifikatzeko», gaineratu zuen.

Testuinguru horretan, sailburuordeak prebentzio-kultura berri baten eta prebentzio-estrategien paradigma-aldaketa baten beharra defendatu du, lantokiei buruz hitz egiteaz gain, pertsonengan arreta jartzeko eta edozein dela lan egiten duten lekua.