Bizkaiko zahar etxeetako langileek greban jarraitzen dute. Atzo Algortan egindako manifestazioari jarraipena emateko, larunbat honetan Bilbon egin dute protesta. 11.45ean abiatu da manifestazioa Zabalburutik eta Bilboko Udaletxean bukatu da. Sektore feminizatuetan gatazkak nola luzatzen diren salatu dute gaurkoan.

Erakundeen «hipokrisia» salatu dute langileek, kasu honetan Bizkaiko Foru Aldundiarena. «Ahoa betetzen zaie esanez emakumeek pairatzen duten soldata arrakalarekin amaitu behar dela. Baina gero, emakume horiek, egoitzetakoak bezala, soldata-arrakalarekin amaitzeko borrokatzen dutenean, izugarri luzatzen dira gatazkak, erakundearen beraren erantzukizun zuzenagatik», adierazi dute.

Bide horretan, egoitzetako langileek nabarmendu dute egoitzak pribatizatzeko erabakia «politikoa» dela, «ondorio larriak dituela langile eta erabiltzaileentzat, eta haien borrokaren azken helburua egoitzak publiko bihurtzea dela».

2020tik blokeatuta dagoen sektoreko hitzarmena berritzea eta Udal eta Foru egoitzetako langileen lan baldintzak parekatzea beharrezkoa dela azpimarratu dute.

Hori dela eta, egoitzetako langileek Bizkaiko Foru Aldundiari eskatu diote «propaganda gutxiago egiteko» eta «ekintza zehatzak» martxan jartzeko, hala nola hitzarmena berritzea, langile horiek jasaten duten soldata arrakalarekin amaitzeko.