
Lakuako Gobernuak eta Donostiako Udalak Gipuzkoako hiriburuan babes ofizialeko 5.000 etxebizitza baino gehiago eraikitzeko «akordio historiko bat» lortu dutela adierazi dute igande honetan. Egitasmoa posible egiteko, hamabi udal lurzati laga dizkio Donostiak Exekutiboari, hirian «gero eta handiagoa den etxebizitza eskariari erantzuteko».
Etxebizitza eta Hiri Agenda sailburu Denis Itxasok erakundeen arteko lankidetzaren garrantzia azpimarratu du, eta aitortu duenez, «argi dagoena da erakundeen arteko egungo lankidetzaren erritmoa eta maila, alokairuko babes ofizialeko etxebizitzen parkea nabarmen handitzeko, ez zela nahikoa, eta Eusko Jaurlaritzaren etxebizitza-zorroa eskuratu eta berehala egin genuen lehen diagnostikoa dela».
Akordioak hiriko lursail estrategikoetan etxebizitzak sustatzea aurreikusten du, besteak beste, Auditz Akularren, Loiolako Kuarteletan, Txomin Enean, Martutenen eta Easoko Playa de Vias-en.
Jarduera horiei esker, Etxebiden erregistratutako alokairuko etxebizitza babestuen 7.000 eskatzaile ingururen zati handi bati erantzun ahal izango zaiola nabarmendu du Lakuak ohar bidez.
«Inoiz ez da horrelako plangintzarik onartu bi erakundeen artean. Donostian alokairuko babes ofiizialeko etxeen ia 7.000 eskatzaile ditugula Etxebiden erregistratuta kontuan hartuta, Udalarekin adostutako ibilbide-orri honek eskariaren ehuneko oso altuari aurre egiteko aukera ematen digu», nabarmendu du Itxasok. «Eta hau hasiera baino ez da», gaineratu du.
Legealdia hasi zenetik, Gobernuak eta Donostiako Udalak etxebizitzaren arloko ahaleginak areagotu egin dituztela azpimarratu du sailburuak, ikuspegi partekatu batekin: «hiriko etxebizitza babestuen parkea nabarmen handitzea».
«Behin eta berriz errepikatu dugunez, etxebizitzaren arazoak konponbidea du, eta akordioa eta ituna dira benetako asmo handiko helburuak lortzeko bide bakarra», adierazi du Itxasok.
Lakuak, Imanol Pradales lehendakariaren eta Itxaso sailburuaren bitartez, hirigintza-izapideak arintzeko borondatea adierazi du, proiektu horiek ahalik eta lasterren gauzatu ahal izateko.
«Orain erritmoa ezarri behar diegu hirigintzako izapideei, administrazioen arteko funtzioen banaketari eta proiektu eta obren lizitazioari», ziurtatu du Itxasok, eta berretsi du Exekutiboak konpromisoa duela etxebizitza horiek «azkar eta eraginkortasunez» egiteko.
«Anbizioak eta arriskuak hartzeak bakarrik jarriko gaituzte arrakastaren bidean», esan du sailburuak.
Gobernuak nabarmendu nahi izan du itzarmen horrekin bi erakundeek «urrats sendo bat» eman dutela «hiri-eredu inklusiboago bat finkatzeko bidean, non etxebizitza babestua eskuratzea politika publikoaren lehentasun bihurtzen den».

‘El Inhumano’ de ‘La infiltrada’, señalado por torturas en Via Laietana y en Gipuzkoa
Fermin Muguruza pone Madrid en ebullición con su akelarre antifascista

Operación «preventiva» de la Ertzaintza contra un torneo de fútbol de calle en Gasteiz

Elkarrekin y Elorza unen fuerzas para convertir San Bartolomé en «el Waterloo» de Eneko Goia
