Lau kilometro baino gehiagoko ibilbideak eta hiru kontzertu, jolas eta jarduera gunek osatuko dute maiatzaren 25ean Galdakaon egingo den Ibilaldiaren 47. edizioaren espazioa. Eguzkibegi ikastolak antolatu du bigarren aldiz, eta aurtengo leloa ‘Magaletik herrire, euskara erdire’ da.

Bizkaiko ikastolen jaiaren xehetasunak prentsaurrekoan aurkeztu dituzte astearte honetan Euskaltzaindiak Bilbon duen egoitzan Oihane Arana ikastolako lehendakariak, Itxaso Etxebarria ikastetxeko zuzendariak eta Josu Telleria Ibilaldiko lehendakariak.

Programa eta jarduerak «komunitate osoaren lanaren emaitza dira», azpimarratu du Etxebarriak. Adierazi duenez, «hezkuntza-komunitate osoak, ikasleek, irakasleek eta ikasle ohiek, baita gurasoek ere, antolakuntzan lagundu dute». Ikastetxeak jardunaldia antolatzen duen bigarren aldia da: aurretik 2009an ospatu zen udalerrian.

Berezitasun moduan, aurten, Ibilaldia larunbatean hasiko da. Hirugarren gunea, Erdiko gunea, Krutzeko plazan, 17.30etatik 22.00etara zabalik egongo da, «motorrak berotzeko eta herria animatzeko», Aranak azaldu duenez. Bertan, Athletic Genuine taldeko jokalariek emango diote hasiera futbol txapelketa batekin. Lehiaketa honetan nahi duten guztiek parte har dezakete. Tartean, umeentzako tailerrak, DJak eta Bengo taldea izango dira.

Programa eremuka

Ibilaldiaren 47. edizioak hiru gune nagusi izango ditu, 4 kilometro baino gehiagoko ibilbidean zehar banatuta. Lehenengo gunea, ‘Magala’, Eguzkibegi ikastolan bertan egongo da. Jardunaldia 11.00etan hasiko da Erronka DBH lehiaketarekin, Taupadak eta Dantza Plaza Andra Mariren eskutik bi dantza emanaldi izango dira eta 13.00etan Akerbeltz erromeria izango da. 14.30etik 19.00etara, Estitxu Robles, Mitxel Play eta Dj Bull arituko dira.

Bigarren gunean, Romualda Zuloaga plazan, «komunitatearen ordezkari», antolatzaileek azaldu dutenez, Motx pailazoarekin zabalduko dute egitaraua 11.00etan, ondoren Go!azen 12.30ean, Taupadak taldeak hartuko du lekukoa 13.30ean, eta 14.00etan, Harritik emakumeen kirol ikuskizuna eskainiko du. Arratsaldea, 15.00etatik 19.00etara, musikala izango da Zazpizar erromeriarekin, musika eskolako kalejirarekin eta Kai Nakairekin.

Hirugarren gunea igandean hasiko da, Tor magoarekin, 11.00etan, eta Herri Kirolak egingo dira haurrentzat, 12.00etan, eta erakustaldia 13.00etan. Dj Kaktusek 15.00etatik aurrera joko du eta Ollokik 16.00etan eta Oxabik 17.30ean osatuko dute musika.

Gainera, aurten, 14 eta 16 urte bitarteko Eguzkibegi ikastolako ikasleak lagunartean lehiatuko dira Baionako Estitxu Robles ikastetxeko ikasleen aurka.