Mubilen aholku batzordeak lehen bilera egin du asteazken honetan, Araba, Bizkai eta Gipuzkoako mugikortasun adimendun eta jasangarriaren norabidea gidatuko duen aholkularitza organoak. Saio honek trakzio enpresen eta erreferentziazko erakundeen arteko lankidetza etapa berri baten hasiera adierazten du, sektorearen erronkei erantzun berritzaileak elkarrekin eraikitzeko helburuarekin.

Lantaldea industria eta energia ekosisteman lider diren enpresen ordezkariek osatzen dute. Besteak beste, Iosu Ibarbia, CAFeko Teknologiako zuzendari nagusia; Imanol Rego, Irizarko CEOa; eta Eduardo Lobato, Iberdrolako Mugikortasuneko Berrikuntzako arduraduna, bertan izan dira. Haiekin batera, Antton Tomasena, Eserguiko zuzendari nagusia; Jose Ignacio Zudaire, Petronorreko Trantsizio Energetikoko zuzendaria; Manu Ayerdi, Mondragon Korporazioko Proiektu Estrategikoetako zuzendaria; eta Jose Ignacio Hormaeche, EAEko Energia Klusterreko zuzendari nagusia ere izan dira. Mubileko zuzendari Igor Villarrealek ere parte hartu du hitzorduan.

Mugikortasun jasangarriaren alde

Mubileko presidente eta Gipuzkoako Aldundiko Ekonomia Sustapena eta Proiektu Estrategikoetako diputatu Unai Anduezak ere parte hartu du bileran, eta elkarlanerako gune berri honen garrantzia azpimarratu du: «Lurraldeak enpresa liderrak eta gaitasun teknologiko paregabeak ditu, eta mugikortasunarekiko konpromiso irmoa du. Aholku Batzordea ikuspegi partekatu bat eraikitzeko sortu da, talentua eta esperientzia batzeko, eta ziurtatzeko Mubilek Europan berrikuntzaren eta lehiakortasunaren eragile izaten jarraitzen duela», adierazi du.

Batzordea sei hilean behin bilduko da, eta bere eginkizun nagusia ekintza-ildoak eta estrategiak zehazten laguntzea izango da, mugikortasun eraginkorrago, adimentsuago eta iraunkorrago baten garapena bizkortzeko. Gainera, Mubilen bilakaera sektorearen benetako lehentasunekin bat datorrela ziurtatu nahi du, ikuspegi ireki, parte-hartzaile eta kolaboratiboaren bidez.

Trakzio enpresen eta erakundeen arteko lankidetza etapa berria

Inaugurazio saio horretan, Mubikek 2028ko Plan Estrategikoa aurkeztu du, asmo handiko ibilbide orria, Mubil mugikortasun jasangarrian Europako erreferente gisa finkatzeko. Plana hiru ardatz nagusitan egituratzen da: lurraldea berrikuntzaren hub bihurtzea, ezagutzaren sare global batean integratzea eta zentroaren bikaintasun operatiboa indartzea.

Gainera, Mubilek Europan duen posizio bereizgarria nabarmendu da, abangoardiako azpiegiturei, laborategi espezializatuei eta ekosistemarako funtsezko zerbitzuen eskaintzari esker: produktu berriak baliozkotzetik eta ekintzailetza bultzatzetik, talentua erakartzera, sinergiak sustatzera eta arlo publikoa eta pribatua lankidetzan aritzera.

Mubiletik nabarmendu dutenez, aholku batzordea eratzea urrats erabakigarria da sektorearen erabakitzeko ahalmen kolektiboa indartzeko, eragin handiko proposamenak sortzeko eta lurraldea etorkizuneko mugikortasunean aitzindari bihurtzen jarraitzeko.