EH Bilduk Jose Mari Gorroño buru duen taldearekin, Guztiontzako Herriarekin, aurrekontu akordioa lortu du, ostiral honetan iragarri duenez. «Horri esker, blokeo eta ezegonkortasun instituzionaleko aro bati amaiera emango zaio», nabarmendu du ohar baten bidez.

Zehazki, akordio horri esker, «herritarrek aspalditik eskatutako bi proiektu enblematiko, hala nola Merkatu plaza eta Udal liburutegia, abiaraziko direla» nabarmendu du EH Bilduk, eta, horrez gain, Beheko Ibarrako Ikasgela zerbitzua martxan jartzea ahalbidetuko da, koalizioak programan zeraman proposamenetako bat.

Adierazi duenez, akordioak 820.000 euroko aurrekontu-aldaketa jasotzen du, «Gernika-Lumoren benetako lehentasunetara bideratua». Zehaztu duenez, 700.000 euro baino gehiago Beheko Ibarrako lokala erosteko eta egokitzeko erabiliko dira ikasgelak zerbitzurako. Horrez gain, «datuetan oinarritutako etxebizitza-politikan aurrera egiteko egoeraren azterketa, Txaportan hiri-atletismoko ibilbide baten bideragarritasun-azterketa, Udaleko lanpostuen balorazio-prozesua ixteko partida, kiroldegian erasoei aurre egiteko protokoloa, berdintasunean eta zaintzan aurrera egiten jarraitzeko neurriak...» azpimarratu ditu.

«Etapa zail baten amaiera»

EH Bilduren iritziz «urrats garrantzitsua» da Gernika-Lumorentzat, eta «keinu horrekin, EH Bilduk beste behin ere herriaren interesak edozein kalkulu alderdikoiren gainetik jartzeko borondatea erakutsi» nahi izan du. «Akordio honek amaiera ematen dio Gernika-Lumoko Udalean bizitako etapa zail bati, eta aukera bat irekitzen du elkarrizketa eta akordioetara iristeko gaitasuna berreskuratzeko, herriak aurrera egin dezan ezinbestekoa den bultzada lortzeko bidean».

Akordioa iragartzeko oharrean, EH Bilduk herriaren egoera politikoa ekarri du gogora. «EAJ-PNVk, EH Bilduk alkatetza hartzea eragozteko helburu bakarrarekin, akordio bat sinatu zuen Jose Mari Gorroñorekin, ondoren bertan behera uzteko eta EH Bilduri zentsura-mozio bateratu bat aurkeztea proposatzeko. Mugimendu hark ez zion Gernika-Lumo gobernatzeko benetako interesari erantzuten, herritik kanpoko proiektu bat inposatzeko borondateari baizik, Guggenheim museoa Dalian eraikitzeari, alegia».

Gogora ekarri duenez, «une hartan, EH Bilduk bere alderdiaren interesen gainetik jarri zituen Gernika-Lumoko interesak. Ordutik, EAJ-PNVren politika bakarra zubi guztiak dinamitatzea, konfiantza haustea eta akordiorako edozein aukera zapuztea izan da», arbuiatu du. «Dalia eraistearen erantzulea da, eta Busturialdeak azken urteotan astindu duten kaos instituzionalaren, larritasunaren eta ziurgabetasunaren arduraduna. Guggenheimarekin azkenean zer gertatu den ikustea besterik ez dago».

Hori dela-eta, Udaleko egoera «gero eta zailagoa eta korapilatsua» bihurtu zela azpimarratu du EH Bilduk. «EAJ-PNVrekin aurrera egitea ezinezkoa izan da —EH Bildutik datorren edozein ekimen sistematikoki baztertzeko hautu esplizituarekin, eta benetako alternatibarik gabe Udal gobernuaren proposamen guztiak atzera botatzeko estrategiarekin—, baina Jose Mari Gorroñoren taldearekin esertzea posible izan da aurrekontuetan akordio bat lortzeko».

Gernikarrentzat «baliagarria» den akordio bat bilatu du EH Bilduk eta, modu berean, EAJri eskatu dio «biktimismoa eta ezetza gainditzeko, Sabin Etxeara begiratzeari uzteko eta Gernika-Lumora begiratzen hasteko».

Gorroño, pozik EH Bilduren jarreragatik

Jose Maria Gorroño Gernikako alkatea «oso pozik» azaldu da EH Bilduk emandako babesarekin. Haren ustez, «ezin da liskarrarik egon» alderdien artean, «akordioetara iristea baita herriak nahi duena».

Ildo horretatik, Gorroñok azpimarratu du bere alderdiaren ibilbidea: «Entzutea, hitz egitea eta adostea izan dira beti gure ideiak. Lehenengo legealdia ANVrekin adostu genuen, bigarrena Sorturekin, hurrengoa EAJrekin eta orain EH Bildurekin».

Gogorarazi du 2024ko maiatzean bere taldeak hainbat proiektu aurkeztu zituela, besteak beste, anbulatoriora igotzeko eskailera mekanikoa, haur parke estali berri bat edo Pasealekuko eskoletako liburutegi berria. Orduan, Gorroñok deitoratu duenez, «EAJk aurka bozkatu zuen, kudeaketa blokeatuz eta geldituz». «Hau da, hobekuntzaren eta aurrerapenaren aurka bozkatu zuen EAJk», salatu du.