Hausnarketak, erritmo biziak eta oihu feminista gailendu dira Hatortxuko hirugarren egunean

Hatortxu Rock-en azken edizioa bere amaierara iristen ari den honetan, atzo, larunbatean, Lakuntza berriro bihurtu zen musika, festa, aldarrikapen eta konpromisoaren erdigune.

Lakuntzan goizetik zabaldu zen energia berezia: kalejirak, dantza kateak eta barre artean hasi zen eguna, karpak eta zelaiak jendez betetzen zihoazen bitartean. Herri txiki batek milaka pertsona hartu eta bihotz erritmo berean taupadarazteko duen gaitasuna berriz ere azaldu zen.

Hausnarketarako tartea ere egon zen NAIZ Gunean eguerdian eskainitako mahai-inguruan,  Iñaki Soto GARAko zuzendariaren gidaritzapean, presoen egoerari buruz mintzatu ziren Mikel Mundiñano (Sare), Aduna Mendizabal (Harrera) eta Onintza Ostolaza abokatua.

Gauean, eszenatoki nagusiaz gain, karparen azpian eta kanpoan sortu ziren momentuek hartu zuten protagonismoa. Abesti bakoitzarekin gorputzak dantzan eta ahotsak batera altxatu ziren, eta une batean oihu feminista sendo batek hautsi zuen ohiko soinu guztia, festa beste dimentsio batera eramanez.

Egun osoak utzi zuen sentsazioa argia izan zen: musika aitzakia, topagunea benetan. Lagun berriak, besarkadak, irribarreak eta momentu kolektiboak kateatu ziren, Hatortxuren azken txanpa honetan bizipenari garrantzia emanez. Lakuntzak gauerdian arnasa hartu zuenean, oraindik bazekien gauak ez zuela etenik izango.

Igande honetan Hatortxu Rock bere amaierara iritsiko da eta egun hunkigarria aurreikusten da. Gainera, gaur, sarrera doan da gerturatu nahi duen ororentzat.