Izaskun Martinez, Ilazki Baratze, Pablo García eta Elixabete Ansa
Jardunaldi Aldaketa Gehiengo Soil Bidez guraso taldea

Eskola jardunaldia eta hezkuntza proiektua

Ez dute argitu (hauteskundeak tarteko) noiz idatzi eta ebatziko den Foru Agindu hori.

Urtarrilaren 11n eta 12an, Nafarroako Eskola Kontseiluak, Nafarroako Hezkuntza Departamenduaren eskariekin bat eginez, antolatutako eskolen jardunaldiari buruz prentsa mailan jasotako hausnarketen harira, lerroburu kezkagarri batzuk ikusi ditugula azpimarratu nahi dugu.

Hasteko eta behin, hausnarketarako topagune izan behar zuen jardunaldia, erabat objektiboa ez dela izan adierazi nahi dugu jardunaldi jarraiaren alde lanean dihardugun eskola desberdinetako guraso taldeak.

Izan ere, hiru hizlarietatik bi aditu jardunaldi etenaren alde mintzatu baitziren, eta hirugarrenak (guztiak hala izatea espero / nahi bagenuen ere) ez zuen egin ez bataren ez bestearen alde.

Hain justu, hirugarren honek, Jose Luis Bernal Agudok, kontuan hartu beharreko baieztapen bat aipatu zuen: ordutegi baten edo bestearen arteko alde bakarra eskaintzen den Hezkuntza Proiektuan datzala. Baina ez ditzagun gauzak nahita nahastu: egun familiek ez baitugu Hezkuntza Proiektua osatzeko eskumen zuzenik. Hori zuzenean ikastetxeei dagokie, eta ez familiei.

Familien eskuetan egun dagoen bide bakarra, ordutegia bozkatze aukera ematen zaigun ikastetxeetan, bata edo bestea aukeratzean datza. Are zehatzago, Hezkuntza Departamenduak ezarritako galdera hau erantzuteko aukera hau emango zaigu: «Ados al zaude eskolaldia aldatzeko proiektuaren, eskolaldi  etengabea / malgua izan dadin?».

Alemaniari, Madrili, Valentziari, Bartzelonari eta Aragoiri buruz aritu zaizkigu adituok, baina ez dugu Nafarroan bizi dugun egungo egoerari buruz hitz erdi bat entzun. Eta hau ere harritzekoa da. Izan ere, egun Nafarroako eskola publikoen %80 baino gehiago jardunaldi jarraian ari dira.

Gure harridurarako, aipaturiko jardunaldi hauetan ez dira solastatu, iazko urtarriletik hona, eskola jardunaldia arautuko duen Foru Agindu berria osatzeko Hezkuntzako eragile ofizialek, egungo eskoletako zuzendariek, sindikatuek edo norbanakoek egindako ekarpenei buruz. Hala, ez dute argitu (hauteskundeak tarteko) noiz idatzi eta ebatziko den Foru Agindu hori.

Gisa berean, ez zuten aipamenik egin, prozesua ebazteko garaian Nafarroako Arartekoak Hezkuntza komunitateari eskatu beharreko ehunekoen aldaketari buruzko gomendioei buruz. Jakina baita egun eskatzen diren gehiengo kualifikatu edo berezi horiek gehiegizkoak direla (Lomloek gehiengo berezia izatea eskatzen badu ere).

Amaitzeko, gure taldetik, prozesu hau burutuko den ikastetxeetan ikuspegi kritikoak edo kontrajarriak egingo badira ere, errespetuz eta seriotasunez parte hartzera gonbidatzen zaituztegu.

Izan ere, prozesu hau arautzen duen egungo ebazpenak, familia bakoitzari ikasleko egokitzen zaion bozka kopurua (ez parte hartzekotan), jardunaldi etenaren alde zenbatzen duen bozka bat dela oroitarazi nahi dugu; baita bozka zuriak edo baliogabeko bozkak ere. Hauxe al da justizia? Hau, ikasleria erdigunean jartzea? Noizko haiei ere hitza ematea?

Bilatu