NAIZ.INFO
IRUÑEA

Iruñeko Udalak sanferminetarako gunea ukatu dio Gora Iruñari

Gora Iruña plataformak Udalak sanferminetarako eskatutako gunea ukatu diola salatu du. Egoerari konponbidea emateko bilera eskatu diote Enrique Maya alkateari.

Gora Iruñea plataformako kideak Udalaren erabakia salatzeko eman duten prentsaurrekoa. (Iñigo URIZ/ARGAZKI PRESS)
Gora Iruñea plataformako kideak Udalaren erabakia salatzeko eman duten prentsaurrekoa. (Iñigo URIZ/ARGAZKI PRESS)

Iruñeko Udalak sanfermin jaietarako eskatu zuen gunea ukatu diola adierazi du Gora Iruña plataformak. Udalaren jarrera «itxia» dela salatu dute eta haien jai eredu «pribatizatzailearen» aldean, parte hartzean oinarritutako sanferminak aldarrikatu dituzte eman duten prentsaurrekoan

Alkatetzarekin izan dituzten harremanak ez direla egokiak izan aipatu dute, aldiz, oposiziaoren jarrera txalotu nahi izan dute arazoa konpontzeko egin duen ahaleginagatik.

Sanferminak «interes ekonomikoetan» oinarrituta daudela uste dute eta «parte hartzea eta auzolana» oinarri izango dituen jaiak aldarrikatu dituzte.«Sanfermin koloretsuak geuk egiten ditugu», aipatu dute.

Programa osatua zutela adierazi dute eta eginiko lanarekin jarraituko dutela aurreratu dute, «nahiz eta ekimenak guk nahi genuen gunean ez izan».

Bihar 21.30ean Udaletxeko Plaza okupatzeko deia luzatu dute eta aurrera begira mobilizazio gehiago iragarri dituzte. Egoerari irtenbidea emateko bilera eskatu diote Enrique Maya alkateari.