NAIZ.INFO
DONOSTIA

Ines del Rioren «berehalako askatasuna» eskatu du Herrirak

Estatu espainiarreko Audientzia Nazionala Europako Giza Eskubideen Auzitegiak Ines del Rioren kasuan kaleratutako epaia aztertzen ari den honetan, Herrira mugimenduak Tafallako presoaren «berehalako askatasuna» eskatu du.

Europako Giza Eskubideen Auzitegiak Ines del Rio Tafallako presoaren inguruan eman zuen epaia aztertzen ari dira Estatu espainiarreko Audientzia Nazionalean. 197/2006 doktrinak Europako Giza Eskubideen Hitzarmena urratzen duela ebatzi zuten orduko hartan eta, egoera horri erantzunez, Ines del Rio «berehala» askatzeko eskatu du Herrirak.

Epaia kaleratu zutenetik hiru hilabete igaro direla gogorarazi du mugimenduak eta Del Rioren kasu berean aurkitzen diren 66 euskal preso politikoen eskubideak «urratzen» ari direla salatu du. Egoera honek luzaro ezin duela iraun azaldu du, «oinazea eta tragedia besterik ekartzen ez duelako».

Herriraren aburuz, normalizazio politikoa eta bakea era «inklusibo» batean eraikitzeko garaia da. Aterabide «positiboak» behar direla azaldu du eta pertsona guztien giza eskubideak errespetatzea aldarrikatu du. Horregatik, 197/2006 doktrina bertan behera uzteko eskatu dio Audientzia Nazionalari.

«Premiazkoa» da Herriraren ustez «muturreko jarrera extremistak» alboratzea, giza eskubideak errespetatzea eta espetxe politika «bake eta konponbidearen bidean» jartzea.