NAIZ
BRUSELAS

Bruselatik abiatuko da 2019ko Tourra, Eddy Merckxen lehen garaipenaren 50. urteurrenean

2019an 50 urte beteko dira Eddy Merckxek bere bost Tourretako lehena irabazi zuela, eta lasterketa txapeldun belgikarra omendu nahi izan du. Horretarako, datorren urteko edizioa Bruselatik abiatuko da eta bi etapa lehiatuko dituzte bertan. Bigarrena 28 kilometroko taldekako erlojupekoa izanen da, Belgikako hiriburan bertan.

Eddy Merckx eta Christian Prudhomme, gaur, Bruselako aurkezpenean. (Thierry ROGE / AFP)
Eddy Merckx eta Christian Prudhomme, gaur, Bruselako aurkezpenean. (Thierry ROGE / AFP)

Bruselan hasiko da 2019ko Tourra. Datorren urtean 50 urte beteko ditu Eddy Merckx belgikarraren lehen garaipenak, eta modu honetan omendu nahi izan dute. Gaur Bruselan bertan egindako agerraldian, Tourreko zuzendari den Christian Prudhommek iragarri du. Tourra bertatik abiatuko den bigarren aldia izanen da, 1958ko edizioaren ostean.

2019ko Tourra 192 kilometroko etapa lau batekin hasiko da, Bruselan hasi eta amaituko dena. Etapak Flandria eta Valonia zeharkatuko ditu, txirrindularitzaren leku seinalatuetako batzuk bisitatuz. Besteak beste, Flandriako Tourraren istorioa idatzi duten Kapelmuur edo Bosberg. Hala ere, helmugatik urruti egonen dira. Etapa ere Woluwe-Saint-Pierre herritik pasako da. Bertan jantzi zuen lehen aldiz maillot horia Merckxek. Bertatik Bruselara itzuliko dira eta esprintean amaitzeko aukera handiak daude.

Hurrengo egunean, bigarren etapan, sailkapen nagusirako lehen aldeak ikusi ahal izango dira. 28 kilometroko taldekako erlojupekoari aurre egin beharko diote-eta Bruselan bertan. Hiriko puntu garrantzitsuenak bisitatuko ditu bigarren egun honek eta Merckx bera izanen da maillot horia jartzeko ardura izanen duena.