Shavon Shields Baskoniako jokalaria izanen da datozen bi denboraldietan. Shields estatubatuarra da, baina nazionalitate holandarra du. Iaz Aquila Basket Trento talde italiarrean jokatu zuen, eta 24 urte eta 2.01 metroko garaiera ditu.

Shields Italiako Ligan nabarmendu zen joan den denboraldian, partidako 13.1 puntu, 3.6 errebote eta 2.6 asistentziako batez bestekoekin. Eurocup lehiaketan aldiz, 11.7 puntu, 3.1 errebote eta 2.3 asistentziako batez bestekoak lortu zituen.

Italiara heldu aurreko denboraldian Alemanian jokatu zuen, Fraport Skyliners taldean, eta orain Endesa Ligara helduko da, NBA udako ligan irudi ona utzi ondoren: New Orleans Pelicans taldean aritu da, partidako 10 puntu, 5 errebote eta 3.3 asistentziako batez bestekoekin.

Shavon Shields talde gasteiztarrak uda honetan egin duen bigarren fitxaketa da, asteartean Youssoupha Fall 2.21 metroko pibot senegaldarra fitxatu zuela iragarri ondoren.

Bestalde, Kirolbet Baskoniak iragarri du Jannis Timma hegaleko letoniarrak taldea utzi eta Olympiacosen jokatuko duela, 2020. urtera arte. Letoniarra iazko udan heldu zen Gasteizera, Zenit San Petersburgotik. Euroligan 33 eta Endesa Ligan 43 partida jokatu ditu Baskoniarekin. Europan, partidako 7.6 puntu, 2.4 errebote eta 1.6 asistentziako batez bestekoak lortu zituen, eta Endesa Ligan 8 puntu sartu zituen batez beste, 7 puntuko balorazio lortzeko.