Kultura eta hizkuntza-dibertsitatea, kulturarteko elkarrizketa, autodeterminazio-eskubidea, gutxiengoen eskubideak, bakea, demokrazia eta Europaren batasuna defendatzen duten pertsona edo erakundeei ematen die urtero saria Coppieters fundazioak. Alor horretan jardun duten pertsonen lana aitortzea da sarien helburu nagusia.
Orain arte, Alex Salmond, Carme Forcadell eta Edmond Simeoni izan dira sarituak eta martxoaren 7an Patxi Zabaleta eta Camilo Nogeira abertzale historiko galiziarra saritzea ebatzi zuen epaimahaiak.
Udazkenean Bruselan egingo den ekitaldi batean emango zaie saria.
Zabaletaren kasuan, epaimahaiak azpimarratu du erreferentziazko pertsona izan dela euskal politikagintzan eta bereziki aipatu dute ezker abertzalearen baitan bide demokratiko eta baketsuen alde eginiko lana.