Brexitak baldintzatuko du laboristen urteroko kongresua

Alderdi Laboristak urteroko kongresua hasi du Brightonen Jeremy Corbyn buruzagiaren gidaritzapean. Alderdiaren politika finkatzeko eztabaidak izango dituzte bost egun iraungo duen biltzarrean, besteak beste brexitari buruzko jarrera bateratu baten gabeziaren inguruan edo Erresuma Batuaren irteeraren inguruan.

NAIZ|21/09/2019
Brexitlabour
Bost egun iraungo du Brightonen hasi den kongresuak. (Daniel LEAL-OLIVAS/AFP)

Legebiltzarrerako hauteskundeak gero eta gertuago dauden testuinguruan, laborismoak brexitak eragindako desadostasun garrantzitsuei aurre egin behar dio gaur hasi den kongresuan.

Brexitari buruzko bigarren erreferenduma egingo balitz, Corbynek jarrera neutrala hartuko lukeela iradoki zuen aurreko astean. Hala ere, laborismoak Europar Batasunean mantetzea defendatzeko kanpaina martxan jarri du aktibista talde batek kongresuan zehar.

Akordiorik gabeko irteeraren aurrean, Corbynek Gobernu laborista batek «irteera akordio zentzuduna» lortuko duela nabarmendu zuen, gero balizko erreferendum baten bitartez bultzatuko zuena. Hori gertatuko balitz, beste aukera blokean gelditzea izango dela iragarri zuen laboristen buruzagiak.

Alderdiaren Batzorde Batearazlearekin mantendutako bilera eta gero, Corbynek alderdiaren helburuak herstura ekonomikoari aurre egitea eta herritarrek brexitaren inguruko «azken hitza» izan dezaten lan egitea direla azpimarratu du.

«Gure konferentzia guztiz bateratua egongo da tory-en gobernu hau garaitzeko, baita herritarrei ekarritako austeritatea eta pobrezia, eta Boris Johnsonek kontuak errendatu behar ez izateko Parlamentua ixteko hartu zuen erabakia garaitzeko ere», adierazi du laboristen buruzagiak.

Kongresuan brexitari buruzko 90 mozio baino gehiago aurkeztu dira eta gehienek iraunkortasunaren kausan sostengua eskatzea dute helburu. Hurrengo astelehenean, erakundearen jarrera definitzeko bozketa egitea espero da.

Guztira, 13.000 lagun gerturatuko dira bost egun iraungo duen eta asteazkenean Corbynen diskurtso batekin amaituko den ekitaldira.