Haritz Larrañaga

Baxoa eta brebeta azterketak bertan behera geratu dira

Jean-Michel Blanquer frantziar Hezkuntza ministroak eman du baxoa eta brebeta probak ez egiteko erabakiaren berri. Osasun krisia hasi aitzin ikasleek eskuratutako notak aintzat hartuta egingo dira ebaluazioak. Lehen mailako ikasleek, ordea, ahozko frantseseko azterketa egin beharko dute.

Lartzabaleko ikasleak brebeta euskaraz egiteko duten eskubidea aldarrikatzen. Bob EDME
Lartzabaleko ikasleak brebeta euskaraz egiteko duten eskubidea aldarrikatzen. Bob EDME

Osasun krisia hasi zenetik etxean diren Kolegio eta Lizeoetako ikasleek ez dute brebeta edo baxoa egin beharrik izango. Urtean zehar bildu dituzten notak hartuko dira kontuan azken ebaluazioa egiteko. Hala ere, Lizeoan diren lehen mailako ikasleek frantseseko ahozko azterketa egin beharko dute ekaina amaiera aldera edo uztailaren hasieran. Aitzitik, Hezkuntza Ministerioak oraindik ez du zehaztu ahozko azterketak nola burutuko diren.

Oraindik ez dago garbi konfinamendua noiz amaituko den eta ikasleek udako oporrak aitzin eskolara joan beharko duten, baina Jean-Michel Blanquer Hezkuntza ministroak ikasturtea uztaila hasiera arte luza daitekeela ohartarazi du.

Ondorioz, konfinamendua amaitu eta ekainean ikasleek eskolara itzuli beharko balute, azterketarik izan ez arren, azken nota eskuratzeko ohiko ebaluazioak egiten jarraitu beharko dute, plantan ezarri duten sistema «ebaluazio jarraia» baita.

Gauzak honela, ikasleek ikasgai desberdinetako testuak landu eta etxeko lanak egin beharko dituzte uztailera arte, eta amaieran, urtean jaso dituzten batez besteko emaitzen araberako kalifikazioa eskuratuko dute. Horregatik, Pazkoko oporrak etxean pasa beharko dituzten ikasleei aholku bat egin die ministroak: «Asko irakur dezatela».