naiz

Mendiak dio EAEko aurrekontuen arrakasta Estatuko Aurrekontu Orokorren menpe dagoela

PSEko idazkari nagusiak, Idoia Mendiak, Estatuko Aurrekontu Orokorrak aurrera ateratzeko «taktizismoak» alde batera uzteko eskatu du, «adinekoak babesteko eta gazteei aukerak emateko». Gaineratu du «Estatuaren Aurrekontu Orokor horien arrakastaren mende egongo direla euskal aurrekontuak eta gainerako autonomia erkidegoenak».

Idoia Mendia, inbestidura-saioan. (Raul BOGAJO/FOKU)
Idoia Mendia, inbestidura-saioan. (Raul BOGAJO/FOKU)

Mendiak hausnarketa hori egin du JSE-Egazen X. biltzarraren amaiera-ekitaldian. Kongresua Donostian egin da, eta Víctor Trimiño aukeratu dute PSEko gazteen idazkari nagusi berri gisa, «inoiz baino etorkizun handiagoa duen» erakundearen kargu.

Gasteizko Gobernu berria eratu ondoren egin duen lehen agerraldi publikoan, bigarren lehendakariordeak, Trimiño zoriondu ondoren, «ziurgabetasun-uneak eta egoera berria» bizi direla ohartarazi du.

Zentzu horretan, adierazi du konpromiso eta politika zehatzak behar direla, eta ziurtatu du alderdi batzuk «beren arduragabekeriarekin eta erabakiak hartzeko duten etengabeko taktizismoarekin» erakusten dutela «ez dakitela eragiten, ez eraldatzen, ez hobetzen».

Horregatik, esan du «konpromisoa» behar dela egungo «errealitateari erantzungo dioten» aurrekontuak aurrera ateratzeko. «Ahulak erreskatatu, gure zaharrak babestu eta gazteei aukerak eskaini behar diete. Espainia osorako aurrekontuak behar ditugu, Europako proiektu eraldatzaile handiarekin bat datozenak», erantsi du.

Mendiak gaineratu du Estatuko Aurrekontu Orokor horien arrakastaren mende egongo direla EAEko aurrekontuak eta gainerako autonomia erkidegoenak. «Gainerako guztiak mugituko ditugun esparrua da», erantsi du.

PSEko idazkari nagusiak EAEko oposizio politikoari eta eragile sozial eta ekonomiko guztiei ere dei egin nahi izan die «elkarrekin arraun egiteko», egoera honetatik «inor atzean utzi gabe» ateratzeko.