Info7 irratian asteari errepasoa #GureGalbahetik:

Rafael Catala Espainiako ministroari torturaren auzia eraman zion asteazkenean Jon Iñarritu EH Bilduren ordezkariak Senatura. Honek, aurrez beste hamaikak egindako moduan, ukatu egin zion torturarik bazenik. Sandra Barrenetxearen kasuan artatu zuen mediku forentsearen hitzak baliatu zituen, gainera, argudio gisa... Ikerketapean dagoen medikuaren hitzak, 2015ean abiatu baizuten bere aurkako espedientea nazioarteko medikuen elkartean «etika hutsa larria» egotzita. Barrenetxearen kasuan ez ezik, Unai Romanoren eta Beatriz Etxebarriaren kasuetan izandako jarrera ere aztergai dute bertan. [Editorial: Las caretas para no ver la tortura siguen cayendo]

Juan Miguel Monge Perez da bere izena. Beste izen propio bat torturaren istorio ilunerako: Jose Maria De las Cuevas Carretero. 1992an Kepa Urra torturatzeagatik zigortu zuten, 1999an indultua jaso zuen, tarte horretan karguz igotzen joan da eta torturari aurre egiteko batzordearen (CPT) aurrean Espainiaren ordezkari gisa jardun du. Bai, torturatzaile bat torturaren aurkako batzordean...

Egiari zorretan Josu Zabala ‘Basajaun’-en kasuan ere. 1997an desagertarazi zuten, bertsio ofizialak bere buruaz beste egin zuela mantendu arren. ‘Egia jakin nahi dugu’ izeneko batzordea osatu dute Etxarri Aranatzen, Josema Mariñenarena da bertako kideetako bat eta argi dio, «egiaz, uste dut denok dakigula egia zein den. Eskatzen duguna egin zutenen aitorpena da». Bere senideen testigantzak jaso ditu asteon Gotzon Aranburuk:

Beste izen propio batzuk: Nekane Txapartegirena, Suitzak Espainiaratzeko baimena eman baitu, helegiterako aukera dago oraindik eta gogor salatu du erabakia Amnesty International elkarteak; eta Arantza Zuluetarena, bere espetxeratzeko asmoz aitzakia bila jarraitzen baitute batzuk, oraingoz kale. Asteon errepresalituen aldeko ekimen berria ere aurkeztu dute, ‘Euskal udaberria kalera’ lelopean.

Ziklo berria hauspotu asmoz...

Herritarren eskutik sortu zena herritarren eskutan amaitzear da... Apirilaren 8an da hitzordua Baionan ETAren armagabetzerako, «bakearen artisauek» deialdia berretsi dute asteon. Adierazpenak bata bestearen atzetik, Espainiak eta Frantziak egingo dutenarekiko, edo egingo ez dutenarekiko, kezka ere bai...

Gehiegi luzatzen ari den trantsizio betean gaude eta aurrera begirakoan erabakitzeko eskubidea gauzatzeko gai izango garen ala ez, hortxe gako nagusietako bat.

Hala izan dadin galdeketak sustatzen ari da herriz herri Gure Esku Dago dinamika eta aste honi beste 30.000 boto gehiago gehituta ekin genion. Aurten izango diren lau «olatuetan» lehena izan da Oarsoaldean, Tolosaldean, Larrabetzun, Astigarragan eta Hernanin. [2014tik hona, parte hartze datuak eta emaitzak herriz herri].

Hezkuntza eremuan protesta parea utzi digu asteak. Asteazkenean irakasleen unea izan zen eta ostegunean milaka ikasle irten ziren kalera.

... eta agur bat, Martin McGuinnessena:

Asteari kolorea autobus transfoboak eman dio... Kasu honetan ez da lege beharrik izan bere ekinbidetea eteteko. Herritarren protestek bidali baitute bueltan etorritako bidetik.