Arabako Ibilbide Berdeen Sareak 650.000tik gora erabiltzaile ditu urtean batez beste

Arabako Ibilbide Berdeen Sarea, 1.000 kilometro bide baino gehiago eskaintzen dituena, urtean 650.000 pertsonak baino gehiagok erabiltzen dute, batez beste. Gaur egun, sareak bederatzi kontagailu ditu, azpiegituren erabilerari buruzko balorazioa egin ahal izateko. Martxotik urrira bitartean izaten dira zifra handienak.

Arabako Ibilbide berdeek lurraldea egituratzen dute, eta hainbat espazio natural lotzen dituzte elkarren artean, bai eta hiri eremuak eta lantokiak ere. «Foru Aldundiaren politiken funtsezko pieza bat dira, Arabako herritarrei ongizatea eta aisialdi osasungarria ekarriko dizkien giza garapen jasangarria 2050erako lortzeko. Horrez gain, tokiko azpiegitura eraldatzen duen tresna da, lurralde jasangarriagoa eta erresilienteagoa lortzeko». Saray Zarate Arabako Foru Aldundiko Ekonomia Garapenaren eta Jasangarritasunaren Saileko diputatuak Arabako Batzar Nagusietan egindako osoko bilkuran esandako hitzak dira.

Bide erabilienak Vasco-Navarro trenbidekoak eta Nerbioiko Parke Linealekoak dira, herrigune garrantzitsuetatik hurbilen dauden tarteekin bat egiten dutenak; Vasco-Navarroren kasuan, Gasteiztik hurbil daudenekin, eta Nerbioiko Parke Linealaren kasuan, Laudiotik eta Amurriotik gertu daudenekin.

Onura funtzionalak, lurraldekoak eta ekonomikoak

«Zifra horiek erakusten dute sareak onura funtzionalak, lurraldekoak eta ekonomikoak dakartzala argi eta garbi, lurralde kohesioa eta konektibitate estrategikoa sustatzen baititu landa ingurunea eta hiri ingurunea lotzeko, eskualdea egituratu eta antolatu nahian», gogorarazi du foru diputatuak.

Bestalde, 2026an, Nerbioiko Parke Linealean egiteke dauden tarteak amaitzeko esku hartzeetan aurrera egiten jarraituko da. Ildo horretatik, Zaratek azaldu duenez, «eraiki berri den Refor-Saratxo tartea Arabako Foru Aldundiak A-625 errepidearen ondoan eraikitako bidearekin lotzeko proiektua lantzen hasi gara. Tarte laburra da, industrializatutako eremu batetik igarotzen dena, eta txirrindulari eta oinezko bihurtu nahi dugu».

Era berean, gaineratu du Saratxo-Urduña tarterako aukerak aztertzen eta proiektuan ere ari direla lanean. «Tarte hori oso konplexua da teknika eta eraikuntza aldetik, desnibel handiak eta ibaiaren ondoko pasabide estuak baititu», zehaztu du.

Zadorraren ibilbide berdeari dagokionez, aurten ibilbidea osatzeko lanak egingo dira. Ibilbidea «intereseko ekintzatzat» jotzen da, ingurumen aldetik zein mugikortasun jasangarria sustatzeko ekintza gisa, zazpi herritako guneak (Gasteiz, Krispiña, Margarita, Trespuentes, Billoda, Langraiz Oka eta Argantzon) eta industrialde bat (Jundiz) lotzen baititu, batetik bestera bizikletaz joateko moduan. Arabako Ibilbide Berdeen Sareak 650.000tik gora erabiltzaile ditu urtean batez beste