Ricardo Gatzagaetxebarria Lakuako Gobernuko Ogasun eta Finantza sailburuak eta Josu Erkoreka bozeramaileak egin dute Europako Batasuneko Justizia Auzitegiaren sententziaren balorazioa. Biak bat etorri dira ezarritako isuna –30 milioi euro– «gehiegizkoa eta neurrigabea» dela esaterako orduan, eta zuhurtziaz jokatzeko deia egin dute, epaia osorik aztertu artean.

Gatzagaetxebarriak esan duenez, Gobernu espainolak nola jokatzen duen ikusi behar da lehenik, eta ondoren euskal erakundeen artean hitz egin. Hala, Lakuako Gobernuak eta Bizkaia, Araba eta Gipuzkoako Foru Aldundiek Finantzen Euskal Kontseiluan hitz egin beharko dutela adierazi du.