NAIZ

Bilbao eta Agirrek Patagonian jasandako istripuak eragindako kostuentzat kontua zabaldu dute

Patagonian Iker Bilbaok, Amaia Agirrek eta Josu Linazak izandako istripuaren ondoren ingurukoek Argentinara egin behar izan zuten bidaia ordaintzeko kontu korronte bat zabaldu dute. Nabarmendu dutenez, diru honekin ez da gorpuen erreskaterako espediziorik finantziatuko.

Amaia Agirre, Iker Bilbao eta Josu Linaza, kontu korrontea zabaldu dutenek martxan jarri duten blogeko irudian.
Amaia Agirre, Iker Bilbao eta Josu Linaza, kontu korrontea zabaldu dutenek martxan jarri duten blogeko irudian. (IKERAMAIA.EUS)

Hilaren 19an Patagoniako Fitz Roy mendian izandako elur jausi batek Iker Bilbao eta Amaia Agirre harrapatu zituen. Biak bizia galdu zuten eta ezin izan zituzten gorpuak erreskatatu. Josu Linaza ere han zen, baina onik atera zen.

Egun batzuetara, senide eta gertuko lagunen talde txiki bat Fitz Roy ingurura abiatu zen gorpuak berreskuratzeko asmoarekin eta «dolu-etapa amaitzeko asmoz». Zoritxarrez, Patagonian zeuden baldintzak direla eta ezinezkoa izan da gorpuak berreskuratzea.

Talde hau alpinista adituek eta boluntarioek osatzen dute eta Patagoniara joan ahal izateko euren lanak utzi zituzten epe mugagabez.

Egoera honek gastu batzuk sortu ditu eta horri aurre egiteko kontu korronte solidario bat zabaldu dute Durangoko Laboral Kutxan.

«Gardentasun osoz jakinarazten dugu: Kontu korronte honetan bildutako dirua Patagoniara joan diren boluntarioen gastu logistikoak eta operatiboak ordaintzeko erabiliko dela elur-jausiak Fitz Royn kaltetutako Iker Bilbaoren, Amaia Agirreren eta Josu Linazaren egoera ezagutzeko», azaldu dute ekimenaren bultzatzaileek.

Ez da erreskaterik egingo

«Ez dagoela inolako espedizio edo erreskate mota finantzatzeko asmorik», azpimarratu dute.

Boluntarioen behar ekonomikoei aurre egiten diotenean eta kontu korrontean dirua gelditzen bada, Andeetako El Chantel laguntza batzordeari emango zaio erreskate materiala erosteko. Horrela, etorkizunean egon daitezken erreskate lanetan lagundu nahi dute.

Helburu horiek amaitu ondoren, kontu korrontea itxi egingo dute.