Graf Zeppelinaren balentriak

Gaurko egunez, 1930eko maiatzaren 18an, Graf Zeppelinak (LZ 127) Ozeano Atlantikoa bi aldiz zeharkatuko zuen hegaldia abiatu zuen, 27.000 kilometro inguruko distantzia osatzeko helburuz. Konde alemaniar batek, Ferdinand von Zeppelinek, bere herrialdean aire-nabigazioan aitzindaria zenak, bere izena eman zion orduan munduko aireontzirik handienari. 236,6 metroko luzera, 30,48 metroko diametroa eta 105.000 metro kubikoko bolumena zituen eta alemaniar zeppelin honek 129 km/h-ko abiadura maximoa lor zezakeen, 550 hp-ko Maybacheko bost motorren indarrari esker; 60 tonako karga ere garraia zezakeen. Bitxia bada ere, tripulazioak (40) bidaiari kopurua bikoiztu egiten zuen (20). Graf Zeppelin 1928ko irailaren 18an aireratu zuten lehen aldiz eta, urtebete geroago, 21 egunean munduari itzulia eman zion lehen bidaia gauzatu zuen. William Randolph Hearst magnateak bultzatu zuen eta Lady Grace Drummond kazetariak -ontzian zegoen emakume bakarrak- lekukotza lanak egin zituen 34.600 kilometroko bidaia hartan. Orotara, 600 bidaia egin zituen Graf Zeppelinak, Atlantikoaren gainean 150 aldiz egin zuen hegan eta Artikorako ikerketa polarreko hegaldi batean ere parte hartu zuen. Hego Amerikarekin karga- eta posta-bide arrunt bat ere ezarri zen haren bidez 1936an. Irudi honetan, hegazkina bere tamaina osoan ikus daiteke, baina argazki gehiago ere badago, horietako batzuk New York, Chicago, Berlin, Buenos Aires, Rio de Janeiro, Londres, Munich eta Jerusalemeko zeru gainean ateratakoak, baita Kairon, Moskun edo Madeiran ere. Zeppelina 1940an desegin zuten ehiza-hegazkinen piezak egiteko.