Komiki proiektu bat lagunduko du Durangoko Azokako 8. Sormen Bekak

Sormen Beka DA! sortzaile berriei zuzendutako deialdi berria ireki dute Durangoko Azokak eta Gerediaga Elkarteak. 8. edizioan komiki proiektu bat lagunduko dute 15.000 eurorekin eta zabalkundea erraztuz. Irailaren 21era arte dago proiektuak aurkezteko aukera.

Sortzaile berriei zuzendutako Sormen Beka DA! deialdi berria ireki berri dute Gerediaga Elkarteak eta Durangoko Azokak. Iragarpena asteazken goiz honetan egin dute Durangon eman duten prentsaurrekoan eta, jakinarazi dutenez, 2025. urteko edizioan komiki proiektu bat lagunduko du bekak.

Egitasmoaren helburu nagusia euskarazko sorkuntza sustatzea eta sortzaile berrien bidea erraztuz euren lana ezagutzera ematea dela ekarri dute gogora, eta beka eskuratzen duen proposamena 2026ko Durangoko Azokako nobedadeetako bat izango dela nabarmendu dute.

Aurreko zazpi edizioetan, literatura, musika, ikus-entzunezkoa, proiektu digitalak, arte eszenikoa, familia transmisioan eragiteko proposamena eta Durangoko Museorako esku-hartze artistikoa saritu dira.

Beka 18 urtez gorako sortzaile berriei zuzendua dago (bakarka gehienez bi lan argitaratu izan ditzake), bakarka zein taldeka aurkeztu daitezke proposamenak eta irabazle suertatzen den proiektuak 15.000 euro eta sorkuntza prozesurako eta plazaratzeko laguntza izango ditu. Proiektu bakarrari emango zaio saria.

Lanak aurkezteko epea irailaren 21eko 18.00etan amaitzen da. Behin proposamenak jasota, epaimahaiak lauzpabost hautatuko ditu eta hautatuek proiektuaren defentsa egin beharko dute epaimahaiaren aurrean. Lan irabazlearen berri 60. Durangoko Azokan emango da. Informazio gehiago eta bekaren oinarriak Durangoko Azokaren webgunean kontsulta daitezke.