Ardoa eta kola, luxuzko koktel?

«Kali-motxo esaten diogu eta lagunekin edaten dugu». Horrelaxe dio Pepsik sarean zabaldutako mezuak, bere iragarki berriaren bideoa atxikita. Bertan, Euskal Herrian aski errotutako edaria prestatzeko modu bitxi samarra aurkezten du freskagarrien etxe estatubatuarrak: aurrena, izotz koskorrez beteriko edalontzi luze eta estu bat hartzen du tabernariak; gero, erdiraino-edo ardo beltza gehitzen dio; segidan, markaren 1893 edariarekin osatzen du; eta azkenik, limoi puska jartzen edalontziaren ertzean. Oso sofistikatua guztia, luxuzko koktel bat balitz bezala. Bideoaren hedapenak zalaparta sortu du.