28 AVR. 2023 Osakidetzako gehiengo sindikalak elkarretaratzeak egin ditu GARA BILBO ELA, SATSE, LAB, SME, CCOO eta UGTk deituta, Olagibeleko (Gasteiz), Eibarko eta Kabiezesko (Santurtzi) osasun zentroetan elkarretaratzeak egin zituzten atzo Osakidetzako langileek, Lehen Arretaren desegitea salatzeko. Sindikatuek sarri salatu dute Osasuneko Mahai Sektorialaren blokeoa. «Sagardui sailburuaren taldeak alde bakarrez hartutako erabakiak aurrera eraman nahi ditu, sindikatuen iritzia jakin gabe», azaldu zuen ELAk. Hori dela eta, Osakidetzan greba egingo dute maiatzaren 18 eta 19an. 18-19 LEParen gaineko ebazpena 2020-21-22 LEPeko azterketak egin aurretik eman dadila eskatuko dute, baita bigarren LEP horren lehiaketa-fasearen ebazpena oposizio-lehiaketaren aurretik eman dadila ere. Hautaketa- eta hornidura-prozesuak arintzeko, giza baliabide eta baliabide material gehiago behar direla ere aldarrikatuko dute lanuztearekin. Greba landa eremuan Arabako landa eremuko Osakidetzako langileek ere greba eguna izan zuten atzo, arretaren kalitatea bermatu ahal izateko baliabideak eskatzeko. %85ek egin zuten bat lanuztearekin.