Hauskortasuna eta erresilientzia

Sundance jaialdian eta Canneseko Zinemagileen Hamabostaldian arrakasta handia lortuta, denboraldi honetako AEBko zinema independentearen sentsazio bihurtu da “Sorry, Baby” filma.

Agnes literaturako irakaslea da Ingalaterra Berriko unibertsitate batean. Bizitza lasaia eta egonkorra du campusean. Ikasle garaiko lagun minaren bisitak, ordea, oraindik ere atsekabetzen duen iraganeko gertakari latz bat azaleratuko du. Narrazio zatikatu baten bidez, filmak haren egunerokoa kontatuko du, lotura pertsonalak berregiteko duen zailtasuna ardatz hartuta, eta hauskortasunari, memoriari eta erresilientziari buruzko erretratu intimo eta neurritsua eraikiz. Filma bost kapitulutan banatzen da.

Opera prima honen zuzendaria, gidoilaria eta aktore protagonista Eva Victor da, eta sexu abusuen eta haien ondorioen inguruko narratibak goitik behera berritzen ditu.

Phoebe Waller-Bridge (“Fleabag”) edota Michaela Coel (“I May Destroy You”) gogora ekartzen dituzten tonu eta ñabardurekin, “Sorry, Baby” filmak tremendismotik ihes egiten du, eta bortxaketa baten biktimaren esperientzia -oraindik ere tabu den gaia- goxotasunez, enpatiaz eta umore ukitu batez jorratzen du, “izan behar duen” jarrerari buruzko estereotipoei iskin eginez.

Komikotasunez eta emozioz beteriko filma da.

EVA VICTOR ZINEMAGILEA

Jatorri frantziarreko aktore, idazle eta zuzendari estatubatuarra da Eva Victor. Komediaren esparruan hasi zuen bere ibilbidea, eta bertan idazkera zorrotzagatik eta ironia eta zaurgarritasun emozionala uztartzeko gaitasunagatik nabarmendu zen. Aktore gisa, “Billions” telesailean aritu zen 2020tik 2023ra, eta “Sorry, Baby” film independentearekin egin du debuta zuzendari gisa. Hain zuzen, film honetan egindako lanagatik, emakumezko aktore onenaren Urrezko Globorako izendapena jaso zuen.