Animaliak gizaki, gizakiak animalia

EVOLUTION
Estatu espainola, 2026. 90’. Zuzend.: Julio Soto Gurpide, Zayra Muñoz Domínguez. Gidoia: Miguel Morán, Adela Gutiérrez, José Tatay, Julio Soto Gurpide. Musika: Alfred Tapscott. 

Irudimena eta umorea elkartu egingo dira  ‘Evolution’ animaziozko filmean; euskaraz bikoiztua estreinatuko da. 

Zer gertatuko litzateke animaliak gizaki bihurtuko balira eta gizakiak animalia? Horixe da komedia honen oinarria, Julio Soto Gurpide iruindarrak eta Zayra Muñoz Domínguezek zuzendua. Substantzia estralurtar batek Zoeren DNA eta haren maskota exotikoarena nahasten duenean, abentura dibertigarri bat hasiko da: gizakiak animali bihurtzen dira, animaliak gizatiartzen dira, eta denek ados jarri beharko dute mundua salbatzeko. 

Filmak diseinu bisual zirraragarria eskainiko du, umorea, abentura eta mezu ekologikoa uztartzen dituen argumentuarekin. Zuzendariek adierazi dutenez, pelikula honek endredozko komediaren bidez gure sen basatiena berreskuratzera gonbidatuko gaitu, berriro ere «oihanaren deia» sentitzeko aukera emanez.