Mexikok, Guatemalak eta Belizek Maia Oihan Handiaren korridore biokulturala sortuko dute

Mexiko, Guatemala eta Belizeko gobernuek elkar ulertzeko memorandum bat sinatu dute Maia Oihan Handiko Korridore Biokulturala sortzeko. 5,7 milioi hektarea baino gehiago babestea helburu duen proiektua da, «planetaren azken biriketako bat eta maien herrien herentzia bizia» babestu nahi duena.

Claudia Sheinbaum Mexikoko presidenteak, Bernardo Arevalo Guatemalakoak eta Juan Antonio Briceño Belizeko lehen ministroak sinatu dute akordioa, hegoaldeko Campeche estatuan. Bat etorri dira ekimen historikoa dela esatean, bai ingurumen-dimentsioagatik, bai esanahi politiko eta kulturalagatik.

«Gaur, memorandum hau sinatuta, ekosistema aberatsa babesteaz gain, Mexiko, Guatemala eta Belizeko lurraldeetan behin loratu zen zibilizazioaren ondarea ohoratzen ari gara», adierazi du Briceñok, muga politikoek ez dituztela kontserbazio-ahaleginak banatu behar azpimarratuta.

Ondare kultural eta naturala

Bestalde, Arevalok azpimarratu du Maia oihana «gizateria osoaren ondare kultural eta naturala» dela, eta hiru herrialdeen konpromisoa dela beren baliabideen erabilera iraunkorra berreskuratzea, zaintzea eta sustatzea, komunitate indigenen eskubideak errespetatuz.

Sheinbaum presidenteak gogorarazi du hau dela hiru estatuburuak ingurumen arloko helburu komun baterako biltzen diren lehen aldia. «Gure kointzidentzia geografiko, kultural eta sozialak aliantza sendo bihur ditzakegu, pertsonen duintasuna, naturaren defentsa eta etorkizun jasangarri baten ikuspegi partekatua erdigunean jartzeko», baieztatu du.

Korridore berriak 0,6 milioi hektarea hartuko ditu Belizen, 2,7 milioi Guatemalan eta 2,4 milioi Mexikon, kontinenteko bigarren handiena bihurtuz Amazoniaren ondoren.

27 eremu babestu

Eskualdeak 27 eremu babestu biltzen ditu Guatemalan, 12 Mexikon eta 11 Belizen. Jaguarraren, guakamaia gorriaren, tapirraren eta quetzalaren habitata da, beste espezie enblematiko batzuen artean.

Proiektuak Eremu Babestuetako Agintaritzen Kontseilua sortzea aurreikusten du, hiru herrialdeetako ordezkariek osatua eta talde laguntzaile baten babesarekin. Ingurumen-erakundeen, enpresarien, akademikoen eta gizarte zibilaren parte-hartzea ere izango du.

Bere helburuen artean honako hauek daude: legez kanpoko zuhaitzen mozketaren aurkako borroka, espezieen trafikoarena, baso-suteena, ezkutuko ehiza eta kutsadurarena. Halaber, birsortze-turismoa eta justizia soziala bultzatu nahi du.