Gasteizko Legebiltzarrak Mikel Mancisidor izendatu zuen atzo datozen bost urteetan Ararteko karguan jarduteko, aurreikusita zegoen bezala. Ezustekorik ez, beraz, bozketari dagokionez, baina aurreikusi gabeko eztabaida liskartsua izan zen osoko bilkuran. Ararteko berriak euskaraz ez jakitea gutxienez haren izendapenaren egokitasuna zalantzan jartzeko motiboa da; beste alde batetik, ezkerreko subiranismoarekiko ezinikusia erakutsi izan du jendaurrean, eta Mancisidorren neutraltasunaren gaineko zalantzak ere arrazoizkoa dirudi. Bi gai horien inguruko jarrerek adostasun zabalagoa lortzea eragotzi zuten eta, beraz, atzoko izendapenak duen adostasuna ez da lortu zitekeen handiena, Sumarreko eledunak esan zuen bezala. 

Herritar guztien eskubideak defendatu behar dituenak euskara ez jakitea garrantzirik gabeko txikikeria da PSEren ustez; hala ere, haren jarrera kezkagarriagoa da. Alderdi horren eledunak erakutsi zuen euskararen aurkako oldarraldia ez dela judiziala bakarrik, eta eskubide arteko talka faltsu bat mahaigaineratu zuen, «hizkuntza eskubideak giza eskubideen gainetik» jartzeko ahalegina gaitzetsiz, eskubideak ukatzen dituzten eskubideak baleude bezala. 

PPk, berriz, ez zuen huts egin bere jito erreakzionarioan. Javier de Andres alderdi horretako EAEko presidentea Estatu sakonaren ordezkari peto modura agertu zen atzo, EH Bildu indar politiko gisa suntsitua izango dela esan eta PP «Espainiako eta Europako alderdi nagusia» dela nabarmenduz. Durangoko alkatetza jeltzalea sostengatzen duen PPko zinegotziak ere ezker subiranista instituzioetatik kanporatzeko eskatu zuen joan den hilean. Beraz, PPren desio edo asmo hori ez da berria, ezta harrigarria ere. 

Hala ere, olatu erreakzionarioaren mehatxuaz ohartarazten duten indarrek beraiek akordio politikoak egiten dituzte ezkerreko abertzaleen sarraskitze politikoa horren normal eta desiragarri iruditzen zaionarekin. Atzo EAEko PPko presidenteak Legebiltzarrean harrotuta agertzeko gonbidapena zuen, eta haren hitzek arrazoia eman zieten akordioak alderdi hori zuritzen duela uste dutenei.