Europar Batasunak bere mugen kudeaketa hirugarren herrialdeen esku uzteko prozesuan beste pauso bat eman zuen aurreko astean. Herrialde bakoitzak onartu beharreko migrante kuota murriztu –berdelaren kanpainari buruz ariko balira bezala dihardute–, konpentsazio ekarpenak gutxitu eta egoera irregularrean dauden pertsonak kanporatzeko erraztasunak ezarri dituzte. Herrialde seguruen definizioa ere moldatu dute, Bangladesh, Egipto eta Maroko multzo horretan sartzeko. Horrela, Europarako bidean herrialde horietatik pasatu eta bertan asiloa eskatu ez duen edozein pertsona hara kanporatu dezakete europarrek, asilo eskaera aztertu ere egin gabe. Mugen kudeaketa hirugarren herrialdeen esku uzten da horrela. Duela bi urte eskandalagarriak ziruditen Italia eta Albaniaren arteko akordioak Europako politika orokor bihurtu dira. Gero galdetuko dute ultraeskuina zergatik ari den hazten.

Ez da hori bakarrik, gainera. Migrazio politika gogortzearekin batera, Nazio Batuen laguntza humanitarioaren finantzaketa murriztu dute Europako estatu askok, Trumpek irekitako bideari jarraituz. Lerroburuak Etxe Zuriko maizter iskanbilatsuak bereganatu ohi ditu, baina haren politikak erraz esportatzen dira AEBtik kanpora. Londresek %39 murriztu du bere laguntza, Berlinek %27, eta Parisek %19; defentsarako aurrekontuak, aldiz, handitu eta handitu ari dira.

Migrazioaren kausa nagusietakoari, pobreziari, aurka egiteko laguntzak gutxitzen dituen bitartean, migrazioaren aurka gotortzen ari da Europa. Horrek emaitza ona izango duela pentsatzea entelekia hutsa da, migratzeko arrazoiak dauden bitartean migrazioa izango baita. Hortxe kontraesan nagusietako bat: migrazioa etetea helburu ei duen eskuin mutur globalaren politikek migrazioa eragiten duten arrazoiak, alegia, pobrezia eta gerra, hauspotzen dituzte. Gurpil zoro hori geldiarazi  beharra dago, baldin eta galbidetik jarraitu nahi ez bada. Jendea bere herria uztera behartzen duten arrazoien aurka ekin behar da, bai, baina ez etorkinen jarioa murrizteko, migratzea bizitzako hautu huts bihurtuko duen mundu justuago bat eraikitzeko baizik.