Jakarta da munduko hiririk jendetsuena, Tokioren biztanleria gainditu ondoren

Jakarta da munduko hiririk populatuena, ia 42 milioi biztanlerekin, NBEren ikerketa berri baten arabera. Orain arte Tokiok zituen biztanle gehien, baina orain Indonesiako hiriburua da zerrendaburu.

 

Java uhartearen ipar-mendebaldeko kostaldean kokatuta, Indonesiako hiriburuaren atzetik Daca dago, 37 milioi biztanlerekin; Tokio –2018ko txostenean biztanle gehien zituen hiria (37 milioi)– hirugarren tokira jaitsi da 33 milioi biztanle baititu, Nazio Batuen Ekonomia eta Gizarte Gaietarako Departamentuak argitaratutako azken txostenaren arabera.

Proiekzioen arabera, Bangladeshko hiriburua zerrendaburu izango da mendearen erdialdetik aurrera, eta Japoniako megaurbea, aldiz, zazpigarren postura jaitsiko da 2050ean.

Metodologia berria

Aldaketa metodologia berri baten ondorio da; metodo horrek estatistika nazionaletan oinarritutako zenbatespenak aldatzen ditu, hiriak kategorizatzeko eredu bateratu baten bidez, inguruko herriak barne, txostenak dioenez.

Jakarta, zeinaren metropoli-area hainbat herritan hedatzen den, 33. postuan zegoen, 11 milioi biztanle ingururekin, 2018ko zerrendan. Irizpide berrien arabera, Indonesiako hiriak Japoniakoa gainditu zuen 2010ean.

Indonesiako hiriburuaren jauzi handia migrazio masiboaren eta azpiegitura proiektu faraonikoen ondorio da. Proiektu horiei esker, megaurbeak asentamendu informalak hazi ditu eta hiriburua beste herri batzuekin elkartu.

Masifikazioak munduan auto-ilara gehien dituen hirietako bat bihurtu du Indonesiako hiriburua, kutsadura eta hondakinen kudeaketa arazo larriak eraginez. Gainera, bere auzoetako batzuk hondoratu egiten dira eta asko itsasoaren mailatik behera daude, uholde ugariekin.

Nusantara

Indonesiako aurreko Gobernua 2022an Nusantara eraikitzen hasi zen, Borneo uharteko hiri bat, Jakarta hiriburu gisa ordezka zezan; hala ere, atzerapenek eta egungo Gobernuaren babes faltak planei buruzko zalantzak sortu dituzte.

Zerrenda berriaren arabera, hamar hiri populatuenetatik bederatzi Asian daude: Jakarta, Daca, Tokio, New Delhi, Shanghai, Kanton, Manila, Kalkuta eta Seul). Kairo da, zazpigarren postuan, kontinente asiarretik kanpo top 10ean dagoen hiri bakarra.

Sailkapen nagusia utzi duten hirien artean, 2018ko zerrendarekin alderatuta, Sao Paulo eta Mexiko Hiria daude.