Erroman, ‘Inpresionismoa eta haratago’ Picasso, Van Gogh, Renoir eta Degasekin

Picasso, Van Gogh, Degas, Matisse edo Renoir dira Erroman ikusgai dagoen ‘Inpresionismoa eta haratago’ erakusketako protagonistak. Iraultza artistiko garaikideetarako bidea erraztu zuten XIX. eta XX. mendeetako artearen historiako aldaketak aztertzen ditu.

Pax jainkosa erromatarrari aldare enblematikoa eskaintzen dion Ara Pacis Museoak Detroit Institute of Arts-eko europar artearen maisu handien 52 lan bildu ditu. Maiatzaren 3ra arte egongo da zabalik.

Erakusketako maisu handienetako batzuk honako hauek dira: Degas eta Renoir inpresionismoaren aitzindariak, Matisse eta Picasso Parisko abangoardietako protagonistak, Van Goghen berrikuntzak edo Kandinsky eta Beckmann bezalako arte alemanaren esperimentatzaileak.

«Artearen historiaren garai hau kalitate handiko lanen bidez kontatzea oso gutxitan gertatzen da Erroman», azaldu du Ilaria Miarelli Mariani komisarioak.

Ibilbide bat korronte desberdinetan zehar

Ibilbidea Frantziako artearen berrikuntzarekin hasten da, bizitza modernoa eta egunerokotasuna islatzen dituzten lanekin, Renoir, Degas eta Cézanne bezalako protagonistekin.

Vincent Van Gogh postinpresionistaren bi koadro ere ikusgai daude. Erakusketan adierazten denez, errealitatea iislatzen dute pintzelkada erritmiko eta dardarti baten bidez, artistaren egoera emozionala biziki islatuz.

Ibilbidearen zati nagusia XX. mendeko lehen bi hamarkadetako Parisko kultur eszenari eskainia dago, Frantziako hiriburua munduko arte-gune gisa agertzen denean eta bertatik Pablo Picasso edo Henri Matisse bezalako maisuak sortzen direnean.

Erakusketa Alemaniako abangoardiari eskainitako atal batekin amaitzen da. Max Pechstein, Wassily Kandinsky eta Lyonel Feiningerren lanak biltzen ditu, gerraosteko Alemaniari begirada bat eskaintzen dioten koadroekin, garaitutako herrialde baten zauriak islatzen dituen dramatismo batek markatua.